Алматыдағы Республика сарайының алдындағы Абай алаңында Наурыз мерекесіне арналған іс-шаралар жалғасып жатыр. Концерттік бағдарлама мен халықтық серуен көктемнің, жаңару мен бірліктің ерекше рухын паш етуде, – деп хабарлайды aqshamnews.kz тілшісі.
Түскі уақытта сахнада жас өнерпаздар — музыка мектептерінің оқушылары өнер көрсетті. Олардың қатарында қазақстандық эстраданың танымал өнерпаздары Қарақат Әбілдина мен Қыдырәлі Болманов негізін қалаған оқу орнының тәрбиеленушілері де бар. Балалар вокалдық нөмірлер, би қойылымдары мен хор ұжымдарының өнерін ұсынды.
Одан кейін бағдарламаны жас орындаушылар жалғастырып, вокал мен сахналық шеберлігін көрсетті. Әсіресе, өнерпаздардың сахналық образдары көрермен назарын аударды. Жиналғандар әрбір нөмірге жылы ықыласпен қолдау білдірді.
Келесі кезекте сахнаға шығармашылық ұжымдар шығып, өнерін ұсынды. Солардың ішінде әнші Тілек Базаровтың өнері ерекше көзге түсті.
«Сақ» этно-фолк тобы дәстүрлі әуен мен заманауи сахналық эстетиканы үйлестіре отырып, көрермендерді тәнті етті. Өнерпаздар қолдан тігілген ұлттық киім киіп шығып, дәстүрлі аспапта ойнап, зор қошеметке ие болды.
Сонымен қатар сахна маңында түркі халықтарының мәдениетіне арналған түрлі елдердің қолөнершілер көрмесі өтіп жатыр. Мұнда ұлттық бұйымдар мен дәстүрлі тұрмыс құрылымдары ұсынылған. Қонақтардың айтуынша, мұндай алаңдар қазақ мәдениетін тереңірек танып-білуге және оны кеңінен насихаттауға ықпал етеді.
«Қазір қыз-келіншектердің ұлттық әшекейлер мен камзол киіп жүргені қуантады. Наурызды кең көлемде атап өту дәстүрді жаңғыртып, жастарды тәрбиелеуге және адамдарды біріктіруге септігін тигізеді», — деді қала тұрғыны Гүлнар.
«Барлығы өте әдемі, адамдар күлімдеп жүр, музыка ойнап тұр — жанға жайлы нағыз мереке», — деді мерекеге қызымен келген Гүлжаухар.
Концерттік бағдарлама күні бойы жалғасады. Кешкі уақытта сахнада қазақстандық эстрада жұлдыздары өнер көрсетеді.
