Өңірлік коммуникациялар қызметінің алаңында Алматы қаласы бойынша Экология департаментінің басшысы Дінмұхамед Лесбеков мегаполистің экологиялық мәселелерін кешенді шешуге бағытталған Жол картасының іске асырылу барысы туралы баяндады, – деп хабарлайды aqshamnews.kz тілшісі.
Оның айтуынша, Жол картасына қаладағы экологиялық ахуалды жақсартуға бағытталған тоғыз іс-шара енгізілген. Бүгінгі таңда олардың екеуі ішінара орындалған, алтауы ағымдағы жылдың соңына дейін аяқталады деп жоспарланған. Бір іс-шара белгіленген мерзімде орындалмай, қазіргі уақытта іске асырылу барысында.
«Жол картасындағы барлық іс-шаралар қалаға түсетін экологиялық жүктемені кезең-кезеңімен азайтуға және қоршаған ортаны қорғау саласындағы өзекті мәселелерді шешуге бағытталған», – деді Дінмұхамед Лесбеков.
Негізгі бағыттардың қатарында жылу-энергетика кәсіпорындарының шығарындыларын азайту, автокөліктерден бөлінетін ластаушы заттарды қысқарту, қаланы сапалы көгалдандыру, қалдықтарды басқару жүйесін жетілдіру, ауа айналымын сақтау және атмосфералық ауаның сапасына тұрақты мониторинг жүргізу бар.
Сонымен қатар, биылғы жылдың бірінші жартыжылдығында табиғат пайдаланушылар табиғатты қорғау іс-шараларын жүзеге асыруға 1,25 млрд теңгеден астам қаражат бөлуді көздеген. Оның ішінде 453 млн теңгеден астамы игерілді.
«Жол картасы мемлекеттік органдардың, кәсіпорындардың, сарапшылар қауымдастығы мен жұртшылықтың бірлескен жұмысы аясында жүзеге асырылып жатыр. Мұндай тәсіл Алматының экологиялық мәселелерін кешенді түрде шешуге мүмкіндік береді», – деп атап өтті спикер.