Жарыстың соңғы күнінде жұптық финал өтіп, жеңімпаздар мен жүлдегерлер марапатталды, – деп хабарлайды aqshamnews.kz тілшісі.
Чемпионатқа Қазақстанның түрлі өңірлерінен келген жас спортшылар қатысты. Бұл дода 2026 жылғы халықаралық жарыстарға іріктеу кезеңі саналады. Атап айтқанда, 15–25 шілде аралығында Таиландта өтетін Азия чемпионаты мен жасөспірімдер арасындағы әлем чемпионатына қатысатын спортшылар анықталды.
Еліміздегі су спорттарын дамытуға жауапты Qazaq Aquatics ұйымы жарысты жоғары деңгейде ұйымдастырды. Ұйымның атқарушы директоры Асель Орынбасарова турнирдің маңызын ерекше атап өтті. - Бұл жарыс спортшылар үшін өте маңызды. Себебі жеңімпаздар мен жүлдегерлер Азия чемпионаты мен жасөспірімдер арасындағы әлем чемпионатында Қазақстан намысын қорғайды. Сонымен қатар біз Олимпиада ойындары, әлем чемпионаттары және Әлем кубогында төрелік ететін халықаралық деңгейдегі төрешілерді шақырдық. Мұндай тәжірибе жас спортшыларға да, жаттықтырушылар мен қазақстандық төрешілерге де үлкен пайдасын тигізеді, - деді Асель Орынбасарова.
Чемпионат кезінде қатысушыларға ерекше көңіл бөлінді. Барлық балаға республикалық және жергілікті көркем жүзу федерациялары атынан естелік сыйлықтар табысталды.
Жарыстың ең жас әрі көзге түскен қатысушыларының бірі - 9 жастағы Тэя Голубцова. Бұл оның екінші жарысы екен.
– Бірінші болып шығу маған қиын болды. Бірақ өз өнерімді жақсы көрсете алғаныма қуаныштымын, – деді жас спортшы.