Жаңа қалашықта Ұлттық ұлан әскери қызметшілеріне арналған әкімшілік ғимараттар мен тұрғын үйлер салынады, – деп хабарлайды aqshamnews.kz тілшісі.
Сонымен қатар әскери техникаларға арналған тұрақтар, қоймалар және инженерлік нысандар бой көтереді.
Алматының «Самғау» ықшам ауданында жаңа әскери қалашық салынып жатыр. Нысан шамамен 27 гектар аумақты алып жатыр. Құрылыс барысын Ішкі істер министрінің орынбасары – Ұлттық ұланның Бас қолбасшысы, генерал-лейтенант Аңсаған Балтабеков тексерді.
Жоба аясында кинологиялық қалашық та қарастырылған. Онда қызметтік иттерді үйретеді және кинологиялық бөлімшелер жұмыс істейді. Қалашыққа қажетті инженерлік желілер мен коммуникациялар да тартылады.
Яғни жаңа нысан әскери бөлім орналасатын аумақ қана емес, әскери қызметшілердің тұруы мен қызмет атқаруына қажетті инфрақұрылымы бар толыққанды әскери қалашық болады.
Құрылыс жұмыстарын 2027 жылдың соңына дейін аяқтау жоспарланған. Нысан пайдалануға берілгеннен кейін Ұлттық ұланның Алматыдағы материалдық-техникалық базасын күшейтуге мүмкіндік береді.