Алматыда алаяқтық пен заңсыз кәсіппен айналысқан микроқаржы ұйымдарының мүлкі тәркіленді.
Олардың кесірінен 327 мыңнан астам адам зардап шеккен. Келтірілген залал мөлшері 30 млрд теңгеге бағаланып отыр. Атап айтқанда, микроқаржы ұйымдары қарызы бар борышкерлерді сыбайлас компаниялармен келісімшартқа отыруға мәжбүрлеген. Бұл ретте кепіл беруші қарыз алушы өлген жағдайда ғана жауапкершілікті мойнына алатын болып шықты. Оған қоса бұл қызметтің бағасы бастапқы заемның құнынан асып түсіп, борышкерлерді одан сайын қарызға батырған. Қазір осындай алты бірдей ұйымға қатысты тергеу амалдары жалғасып жатыр.
Ержан Тайжан, ҚР Қаржылық мониторинг агенттігінің ресми өкілі:
- Бүгінгі таңда микроқаржы ұйымдарының есепшоттарына 1,8 млрд теңге көлемінде тыйым салынды. Сондай-ақ 30 млрд теңге мөлшерінде несие портфеліне шектеу қойылды. Микроқаржы ұйымдарының ұйымдастырушысы екі айға қамауға алынды. Оның жалпы құны 225 млн теңге көлеміндегі екі тұрғын үйі мен BMW X6, Toyota Tundra маркалы автокөліктеріне тыйым салынды.