2025 жылғы 13–20 қазан аралығында Алматы қаласы аумағында «Тұрмыстағы профилактика» атты қалалық жедел-алдын алу іс-шарасы (ЖАІШ) өткізілуде, деп хабарлайды aqshamnews.kz
Алатау аудандық полиция басқармасының тұрмыстық зорлық-зомбылықпен күрес бөлімшесінің қызметкерлері аталған акцияға белсенді қатысуда. Іс-шара аясында тұрғындармен түсіндіру жұмыстары жүргізіліп, профилактикалық есепте тұрған тұлғалар тексерілуде. Әсіресе, қорғау нұсқамалары шығарылған және арнайы талаптар белгіленген азаматтарға ерекше көңіл бөлінуде.
Іс-шараның мақсаты — отбасылық-тұрмыстық зорлық-зомбылықтың алдын алу, қақтығыстарды бейбіт жолмен шешу мәдениетін қалыптастыру, халықтың құқықтық сауаттылығын арттыру.
Полиция қызметкерлері қала тұрғындары мен қонақтарын кез келген зорлық-зомбылықтан аулақ болуға, бір-біріне құрметпен қарауға және барлық мәселелерді бейбіт түрде шешуге шақырады.
Қажет болған жағдайда келесі телефондарға хабарласуға болады:
📞 102 — Полиция
📞 111 — Балаларға арналған сенім телефоны
📞 150 — Зорлық-зомбылықтан зардап шеккендерге арналған бірыңғай қолдау қызметі