IV Халықаралық түркітілдес журналистер медиа форумының тақырыбы – «TURKTIME: түркі елдерінің медиа және туризм бірлігі». Форумға еліміздің әр аймағынан келген БАҚ өкілдері және Түркия, Өзбекстан, Германия, Ұлыбританиядан үздік спикерлер қатысып, бүгінгі медиа кеңістіктегі өзекті мәселелерді талқылауда.
Сондай-ақ, Орталық Азияның БАҚ басшылары, журналистер, ақпарат және туризм саласына қатысты мемлекеттік органдар, депутаттар, PR менеджерлері, медиа саласындағы үкіметтік емес ұйым өкілдері, туризм саласының мамандары, ЖОО-лардың журналистика факультеттерінің декандары мен студенттері, қоғам қайраткерлері қатысты.
Медиа форумды «Түркітілдес журналистер қоры» қоғамдық қорының президенті Нәзия Жоямергенқызы ашты.
Айтулы медиа форум алғаш рет 2018 жылы Ыстанбұлда өткен болатын. Форумның бірінші күні «Түркі елдеріндегі геосаяси ахуал және медиа нарық», «Түркі елдеріндегі туризм және PR», «Ақпаратты тұтынудың болашағы: жасанды интеллект, жаңа форматтар», «Аймақтық БАҚ және бәсекелестік» деген тақырыптарда сессиялар өтті.
Келесі күні БАҚ өкілдеріне арналған семинар-тренингтер ұйымдастыру жоспарланған.