Денсаулық сақтау саласына қосымша 6,5 млрд теңге бөлінеді.
Алдағы уақытта Алматының бірнеше ауданында отбасылық-дәрігерлік амбулатория бой көтереді. Бұл туралы Алматы әкімі Ерболат Досаев мәслихат отырысында айтты, деп хабарлайды Almaty-akshamy.kz.
«Денсаулық сақтау саласында 6,5 млрд теңге қарастырылған. Бұл қаражат Балалардың шұғыл медициналық көмек орталығының операциялық блогы бар қабылдау бөлімшесінің құрылысын аяқтауға (1,9 млрд. теңге), Түрксіб, Алатау, Жетісу аудандарында 4 отбасылық-дәрігерлік амбулатория салуға (850 млн. теңге), Бостандық ауданында емхана салу үшін 2 жер учаскесін (2,2 млрд. теңге) сатып алуға, 15 денсаулық сақтау объектісін салу және реконструкциялау бойынша жобалау-сметалық құжаттаманы әзірлеуге (24,4 млн. теңге) бағытталған», - деді қала әкімі.
Сонымен қатар, әкімнің айтуынша, қаланың медициналық-әлеуметтік мекемелерінде тұратын психоневрологиялық аурулары бар адамдар мен жалғызбасты зейнеткерлер үшін тамақтану сапасын арттырып, рационның түрлерін көбейту үшін 2020 жылдан бері өзгермеген бес мезгіл тамақтану құны 1300 теңгеден 3 000 теңгеге дейін көбейтілген.
Бұл мақсатқа қосымша 382 млн теңге бөлінеді, жалпы сомасы 1,2 млрд теңгені құрайтын болады.
Халықты әлеуметтік қолдауға барлығы 2,3 млрд теңге қосымша қаражат қарастырылған.