Тұрғын үйден 65 адам эвакуацияланды.
Алматыдағы «Ақкент» ықшам ауданында орналасқан тоғыз қабатты тұрғын үйден өрт шықты, деп хабарлайды Almaty-akshamy.kz қалалық ТЖД cілтеме жасап.
Өрт туралы хабарлама сағат 14:30-да түскен.
«Құтқарушылар жеткенде, 7-қабаттағы пәтердің лоджиясында жалпы алаңы 10 шаршы метр жер өртеніп жатқаны және 8-9 қабаттарға таралу қаупі анықталды. Адамдарды эвакуациялау мен құтқару жұмыстары жүргізілді. Қабылданған шаралардың нәтижесінде 7 адам құтқарылып, 65 адам, оның ішінде баласы бар әйел эвакуацияланды. Өрт 15:02-де толығымен сөндірілді. Өрттің шығу себебі анықталып жатыр», - делінеді қалалық ТЖД хабарламасында.
Алматы қалалық ТЖД өрт қауіпсіздігінің қарапайым ережелерін сақтауды, яғни электр құралдарын қосулы күйде қараусыз қалдырмау, балкондарды жанғыш материалдармен қаптамау және темекі шекпеу туралы ескертті.