"Тарифті инвестицияларға айырбастау" бағдарламасы аясында Алматыда электр желілерін жаңғырту бойынша жұмыстар жүргізілуде. Алматының өңірлік коммуникациялар қызметі ұйымдастырған брифингте ҚР Ұлттық экономика министрлігінің Табиғи монополияларды реттеу комитетінің Алматы қаласы бойынша департаментінің басшысы Әсел Буденеева сөз сөйледі.
Оның айтуынша, "АЖК" АҚ 2024 жылға жоспарланған желілерді модернизациялауға 30,5 млрд теңге бағыттайды, оның ішінде 1,8 млрд теңге қосымша инвестициялар бөлінеді. Осы шаралар электр желілерінің тозуын 2,45%-ға азайтуға мүмкіндік береді деп күтілуде. Бұдан бөлек, бұл шаралар апаттық жағдайлар мен нормативтік техникалық шығындарды азайтады.
Сонымен қатар, электрмен жабдықтау тарифтерінің өзгеруі электр энергиясын өндіру және тарату бағасына, инвестициялық құрамдас бөліктің өзгеруіне, сондай-ақ экономикалық көрсеткіштерге байланысты екені атап өтілді.
2024 жылдың 15 қазанынан бастап электр энергиясының орташа бағасы өзгеріп, келесідей болмақ:
- халық үшін ҚҚС-сыз 27,59 теңге/кВт сағ;
- заңды тұлғалар үшін ҚҚС-сыз 30,08 теңге/кВт сағ;
- бюджеттік ұйымдар үшін ҚҚС-сыз 30,47 теңге/кВт сағ.
Жеке тұлғалар үшін тарифтер тұтыну көлеміне байланысты сараланған:
- бірінші деңгей үшін ҚҚС-сыз 25,06 теңге/кВт сағ;
- екінші деңгей үшін ҚҚС-сыз 33,11 теңге/кВт сағ;
- үшінші деңгей үшін ҚҚС-сыз 41,39 теңге/кВт сағ.
Толығырақ ақпаратты https://www.esalmaty.kz/ сайтынан қарауға болады.
Сонымен қатар, Алматы әкімдігі халықтың әлеуметтік осал топтары үшін тарифтердің өсуіне байланысты өтемақы төлемдерін жалғастыратыны атап өтілді. Жоба аясында 140 мыңнан астам адам ай сайын 0,8 АЕК мөлшерінде әлеуметтік төлемдер алды. Бұл төлемдер 2025 жылдың 1 сәуіріне дейін жалғасады.
Алматыда осы санатқа кіретін 333 857 азамат бар, олар әлеуметтік көмек алу үшін қажетті құжаттарын әкімдіктерге тапсыруы керек.