Өңірлік коммуникациялар қызметінде Экология департаментінің былтырғы жұмысын қорытындылаған баспасөз конференциясы өтті. Онда Департамент басшысы Дінмұхамед Лесбеков рұқсатсыз қоқыс үйінділерін анықтау мен жою бойынша қолға алынған жұмыстарын баяндап берді.
Оның айтуынша, «Қазақстан Ғарыш Сапары» ұлттық компаниясының геосервисін пайдаланып, ғарыштан бақылау жүргізгенде былтыр қала аумағында тұрмыстық және құрылыс қалдығын заңсыз төккен 10 жер анықталған. Медеу, Түрксіб пен Алатау ауданында орналасқан олардың барлығы жергілікті атқарушы органдардың күшімен түгел жойылыпты.
«Осындай орындарды анықтап қана қоймай, оларды жойып, қалдықтың қайта жиналуына жол бермеу міндетіміз», - дейді Дінмұхамед Лесбеков.
Алматының аумағында коммуналдық қатты қалдықтарды қабылдайтын полигондар жоқ болғанымен, қалада қоқыс шығару жағы ешқашан кідірген емес. Қазір 20 ұйым осымен айналысады, олар қаланы 100 пайыз қамтып, қалдық атаулыны Алматы облысындағы полигондар мен сұрыптау кешендеріне уақытылы жеткізіп отырады. 2025 жылы 536 мың тоннадан астам осындай коммуналдық қатты қалдық жиналып, шығарылған.
Экология департаменті есептік кезеңде 125 бақылау жұмысын өткізді, оның ішінде нысандарға барып та, бармай-ақ та жүргізілген профилактикалық тексерулер бар. Соның арқасында экологиялық заңнаманы бұзған 109 жағдай анықталып, оларды жою жөнінде 36 нұсқама берілген. Материалдарды қарау қорытындысы бойынша 53 әкімшілік құқық бұзушылық туралы хаттама рәсімделіп, 41 әкімшілік жаза қолданылып, жалпы сомасы 8,5 млн теңге айыппұл салыныпты. Айыппұлды өндірудің деңгейі 99,3 пайызға жеткен.