Алматыда қоқыс шығаратын ұйымдардың жұмысын бақылауға алады, – деп хабарлайды aqshamnews.kz тілшісі.
«Eco Almaty» ЖШС базасында қатты тұрмыстық қалдықты шығаратын 20 ұйымның жұмысын қадағалайтын диспетчерлік орталық жұмыс істейді.
Диспетчерлер нақты уақыт режимінде қоқыс шығару кестесінің сақталуын, контейнер алаңның тазалығын бақылап қадағалап, зақымдалған контейнер мен қоқыс жиналып қалған орындарды тіркейді.
Мұның бәрін GPS дерегі арқылы бақылайды. Қоқыс шығарар алдындағы және кейінгі контейнер алаңдарының фотосуреті жағдайды жедел бағалап, жұмыстың қаншалықты ұқыпты істелгенін тексеруге мүмкіндік береді.
Егер диспетчер бір заң бұзушылықты немесе басқа да бір жағдайды анықтаса, сол жерді тексеру үшін экологқа дереу ақпарат береді. Мұндай тәсіл қоқыс үйіліп қалған жерді жедел анықтап, оны уақытылы шығаруды бақылап отыруға сеп болады.