Күдікті қамауға алынды.
Алматылық қоғамдық көліктерде ер адам қалта ұрлығымен айналысқан, деп хабарлайды Almaty-akshamy.kz Polisia.kz-ке сілтеме жасап.
Алматы полицейлері қоғамдық көліктерде қалта ұрлығымен айналысқан 44 жастағы Шығыс Қазақстан облысының тұрғынын ұстады.
«Бірнеше күннің ішінде ер адам қалалық қоғамдық көліктерде бөтеннің мүлкін 5 рет ұрлаған. Күдікті қала орталығында, Сейфуллин – Мақатаев – Байтұрсынов – Гоголь көшелерінің орамында “жүрген”. Ол таңертеңгі және кешкі “қарбалас уақытта” жолаушылардың қалтасын “тексеріп”, ұялы телефондарды тез және байқатпай суырып алып отырған. Қазіргі уақытта ҚР ҚК-нің 188-бабының 3-бөлігі (Ұрлық) бойынша сотқа дейінгі тергеу амалдары жүргізіліп жатыр. Күдікті қамауға алынды. Тергеудің қазіргі кезеңінде ұсталған азаматтың қала аумағында жасалған осыған ұқсас басқа да қылмыстарға қатысы бар-жоғы анықталып жатыр», – деді Алматы қалалық ПД криминалдық полиция басқармасының бастығы Қуатбек Науатов.