Алматы қаласының полициясы халықтың құқықтық сауаттылығын арттыру және заңға бағыну мәдениетін қалыптастыру мақсатында әлеуметтік бейнероликтер топтамасын әзірледі, – деп хабарлайды Aqshamnews.kz Polisia.kz-ке сілтеме жасап.
Бейнематериалдарда қоғамдық қауіпсіздік мәселелері, қоғамдық орындарда өзін-өзі ұстау ережелері, сондай-ақ құқық бұзушылықтар үшін көзделген жауапкершілік, оның ішінде сталкинг фактілері мен "нөлдік төзімділік" қағидаты аясындағы ұсақ құқық бұзушылықтар қамтылған. Алдын алу жұмысының бұл жаңа форматы ең алдымен жастарға, әлеуметтік желілердің белсенді қолданушыларына және қысқа бейнероликтер арқылы ақпаратты тез қабылдайтын еңбекке қабілетті қала тұрғындарына бағытталған.
Полиция өкілдерінің айтуынша, мұндай бейнематериалдар заң талаптарын қарапайым әрі көрнекі түрде түсіндіруге, құқық бұзушылықтардың алдын алуға және әрбір азаматтың заң алдындағы жеке жауапкершілігін қалыптастыруға мүмкіндік береді. Алматы қаласы Түрксіб аудандық полиция басқармасының бастығы Думан Аухадиевтің айтуынша, бүгінгі профилактика заманауи тәсілдер мен азаматтармен түсінікті тілде сөйлесуді талап етеді.
– Қысқа әлеуметтік бейнероликтер қазіргі таңда, әсіресе жастар арасында, ақпаратты қабылдаудың ең тиімді форматына айналды. Бұл формат қоғамдық орындарда өзін дұрыс ұстау тәртібін, сталкинг үшін және тіпті болмашы көрінетін құқық бұзушылықтар үшін қандай жауапкершілік көзделгенін қарапайым тілмен түсіндіруге мүмкіндік береді. "Нөлдік төзімділік" қағидаты ең алдымен заңды түсінуден басталады, – деп атап өтті ол.
Аудандық полиция басшысының сөзінше, бейнематериалдарды цифрлық платформалар мен әлеуметтік желілерде жариялау кең аудиторияны қамтуға, маңызды құқықтық түсіндірулерді уақытылы жеткізуге және қала ортасында құқық бұзушылықтар мен жанжалдардың туындау қаупін төмендетуге ықпал етеді.