Алматыда тұратын 826 жылдық өтілі бар теміржолшылар әулеті «Мерейлі отбасы» қалалық байқауының жеңімпазы атанды
«Мерейлі отбасы» байқауының басты мақсаты – адамгершілік мұраттарын жаңғырту, отбасы мен некені құрметтеуге тәрбиелеу, сондай-ақ отбасылық құндылықтар мен қазақстандық отбасының оң имиджін көрсету және кеңінен насихаттау.
Биыл Алматыда байқауға 235 отбасы өтінім түсті. Алдымен аудандық іріктеу, содан кейін қалалық іріктеу кезеңдері өткізілді. Теміржолшылар Қапышевтер әулеті жеңімпаз атанды. Отбасында үш ұрпақтан 26 адам қиын да күрделі теміржолшы мамандығын таңдаған. Олардың барлығының теміржолдағы жалпы еңбек өтілі 826 жыл!
«Біз жеңісті күткен жоқпыз, бірақ ерекше қуандық. Бәсекелестік үлкен болды. Енді Астанада өз қаламыздың және теміржолшылар отбасымыздың намысын қорғау үшін мұқият дайындаламыз. Теміржолға деген сүйіспеншілік біздің қанымызда. Осының арқасында біз жеңіске жеттік. Біз өз мамандығымызды шын жүректен жақсы көреміз», - деп өз ойымен бөлісті үлкен әулеттің әрі отбасының басшысы Мұрат Қапышев.
Мұраттың әкесі теміржолшы болған, ол 1932 жылы осы салаға келіп, 1968 жылы зейнетке шыққан. Жұбайымен бірге олар сегіз бала тәрбиелеп өсірді. Олардың барлығы әкесінің жолын қуып, теміржол саласында жұмыс істеді. Мұрат Қапышевтің үш баласы бар және барлығы теміржолда жұмыс істейді.
Республикалық байқаудың финалдық кезеңі Астанада, қыркүйек айында, Отбасы күнін мерекелеу аясында өтеді.