Оқушылар сарайында №64 жалпы білім беретін мектептің ұйымдастыруымен және Алматы қаласы Білім басқармасының қолдауымен «Zhas Maman 2025» мамандықтар жәрмеңкесі өтті.
Іс-шараның басты мақсаты – жоғары сынып оқушыларына болашақ мамандығын дұрыс таңдауға көмектесу, еңбек нарығындағы сұранысқа ие кәсіптермен таныстыру және тиісті білім орнын анықтауға жәрдемдесу. Жәрмеңке барысында оқушылар түрлі колледж өкілдерімен кездесіп, олардан мамандықтар туралы көптеген ақпарат алды. Сонымен қатар, кәсіби бағдар берушілердің қатысуымен өткен шеберлік сыныптарында өз мүмкіндіктерін бағамдап, болашаққа нақты жоспар құруға мүмкіндік алды.
Шараның ашылуында №64 мектептің директоры, модератор Сұлтан Айтбаев сөз сөйлеп, мамандық таңдаудың маңыздылығына тоқталды.
– Биылғы жәрмеңке маңызды кезеңмен – Жұмысшы мамандықтар жылымен тұспа-тұс келіп отыр. Бұл шара – қоғамдағы еңбектің баға жетпес құндылығын мойындаудың белгісі. Қоғамды алға жылжытатын, дамытатын жұмысшы мамандықтардың рөлі ерекше. Біз осы кәсіптерді таңдаған жандардың еңбегін құрметтеуіміз керек. Өйткені олардың арқасында экономика дамып, жаңа мүмкіндіктер ашылады. Бүгін біз адамзаттың барлық жетістіктерінің негізінде тұрған кәсіптермен танысуға мүмкіндік алдық. Құрылысшылар, машинистер, электриктер мен слесарлар – бұл тек мамандық қана емес, өз ісіне адалдықты, жауапкершілікті, адалдық пен еңбекқорлықты талап ететін өмірлік таңдау. Жұмысшы мамандықтар – тек экономиканың тірегі ғана емес, сонымен қатар әр адам үшін тұрақты болашаққа апаратын жол. Бұл салаларда мансаптық өсуге, шығармашылық әлеуетті іске асыруға және елдің дамуына үлес қосуға мүмкіндік мол», – деді ол.
Жәрмеңкеге қатысушылардың бірі, Принтмедиа технологиялар колледжінің студенті Еңлік Бапан да өз пікірімен бөлісті.
– Мен мамандық таңдауда ұзақ ойландым. Осындай жәрмеңкелердің арқасында өзіме лайықты жолды таба алдым. Өзім оқитын колледжімнің де білім сапасы қатты ұнайды. Бүгінгі іс-шара мен сияқты болашақ мамандығын іздеп жүрген оқушылар үшін өте пайдалы болды. Жұмысшы мамандықтар тек қоғамға қажетті ғана емес, сонымен бірге тұрақты табыс пен өз ісіңе деген сүйіспеншілік сыйлайтын кәсіптер. Сондықтан, ең бастысы – жүрек қалауымен таңдау жасау, – деді ол.
Жәрмеңкеге қатысушылар бұл шараның өздеріне үлкен пайда әкелгенін айтып, ұйымдастырушыларға алғыстарын білдірді. Көптеген оқушы өзіне лайықты мамандық пен оқу орнын таңдау бойынша маңызды ақпарат алды.
№64 мектеп пен Алматы қаласы Білім басқармасы алдағы уақытта да осындай пайдалы іс-шараларды ұйымдастырып, оқушылардың кәсіби бағдарын айқындауға қолдау көрсететінін жеткізді.