Жиынға палата төрағасы Айдос Сарым жетекшілік етіп, Мәжіліс вице-спикері Дания Еспаева мен бизнес-қоғамдастық өкілдері қатысты, деп хабарлайды aqshamnews.kz.
Олар жаңа Салық кодексінің жобасын талқылады.
Айдос Сарым Мемлекет басшысы қыркүйектегі Жолдауында салық заңнамасы мәселелерін Үкімет пен Парламентте жан-жақты талқылап, қажетті шешімдер шығаруды тапсырғанын еске салды.
Қыркүйек айынан бастап Мәжіліс жаңа Салық кодексінің жобасын әзірлеп жатыр. Депутат түзету енгізе бермейтін, болашақта тұрақты жұмыс істейтін кодексті қабылдау міндеті тұрғанын атап өтті.
Жаңа Салық кодексі жобасының негізгі бағыттары туралы Ұлттық экономика вице-министрі Азамат Әмрин, Қаржы министрлігі Мемлекеттік кірістер комитеті төрағасының орынбасары Жәнібек Нұржанов ақпарат берді.
Талқылау барысында Мәжіліс депутаты, кодекс жобасы бойынша жұмыс тобының жетекшісі Берік Бейсенғалиев, сарапшылар Ерлан Смайылов пен Наталья Малярчук, бизнес-қоғамдастық өкілдері мен сарапшылар өз ұсыныстарымен бөлісті. Атап айтқанда, «Атамекен» ҰКП Басқарма төрағасының орынбасары, Басқарма мүшесі Тимур Жәркенов әлеуметтік сала ұйымдары, медицина, сондай-ақ тұрғын үй жылжымайтын мүлікті бастапқы сату бойынша құрылыс салушылар үшін қосымша құн салығынан босату жеңілдіктерін сақтауды ұсынды.
Жиын барысында кәсіпкерлердің де пікірлері тыңдалды. Айтылған ұсыныстар Салық кодексінің жобасы бойынша алдағы жұмыс барысында Мәжілісте қаралатын болады.
Жиын соңында вице-спикер Дания Еспаева жалпы Салық кодексінің жобасын талқылауға және жиынға белсене қатысқаны үшін мемлекеттік органдар мен бизнес өкілдеріне алғысын білдірді. Ол өз сөзінде бюджет тапшылығы мәселесіне тоқталып, оны толықтыру әдістерінің бірі – салық базасын ұлғайту екенін атап өтті.
