1-5 қараша аралығында мегаполисте Almaty Creative Week апталығы өтуде, оған 30 халықаралық ұйымнан 130 спикер қатысып жатыр.
Форумға Нидерланды, Франция, Италия, Германия, Ұлыбритания, Қырғызстан, Өзбекстан және т.б. елдердің креативті сегментінің ұйымдары мен білім беру және креативті хабтар тартылған деп хабарлайды almaty-akshamy.kz
Қала әкімінің орынбасары Әлішер Әбдіқадыров Almaty Creative Week апталығының салтанатты ашылуында Алматыда креативті индустрияны дамытуға барлық қажетті ресурс барын атады. Айтуынша, бүгінде бұл сала бойынша қалада 22 мың кәсіпорын жұмыс істейді. 2021 жылдың қорытындысына сәйкес, креативті индустрия саласындағы шағын және орта бизнес субъектілері 5,4 млрд. теңге салық төлеген.
«Бүгінгі форум Алматы қаласы мен креативті қоғамдастықтың барлық өкілі үшін ашық сұхбаттасу, тәжірибе алмасу, креативті индустрияның сапалы әрі үдемелі дамуына қажетті жаңа бизнес үлгісін анықтау мүмкіндік береді. Біздің даму бағытымыз сәулет, дизайн және заманауи өнер, музыка, кино және анимация, сән және қолөнер, жаңа медиа және цифрлық мәдениет, киберспорт және гейм-девелопмент саласында өрбитін болады», – деді Әлішер Әбдіқадыров.
Сонымен қатар, ол креативті индустрияны тиімді дамыту мақсатында Алматыда тиісті инфрақұрылым қалыптастыру, кәсіпкерлікті ынталандыру, бұл саладағы білімді, дағдыны және құзыретті кеңейту бойынша шаралар қабылданатынын айтты.
Алдағы уақытта Алматыда 3 креативті хаб, IT хаб, қалалық венчурлық қор және халықаралық деңгейде екі бейне және дыбыс жазу студиясын ашу жоспарланып отыр. 2030 жылға қарай креативті индустрия саласын кешенді дамыту Алматының жалпы өңірлік өніміндегі креативті индустрия үлесін 5%-ға дейін жеткізіп, креативті индустрия экспортының қызметін 500 млн. АҚШ долларына дейін арттырып, оны экономикалық маңызды салаға айналдыруға мүмкіндік береді.
Қазақстан Республикасы Мәдениет және спорт вице-министрі Ержан Еркінбаевтың айтуынша, қазір креативті индустриямен байланысты өзгерістер мен толықтырулар Кәсіпкерлік кодексіне және «Мәдениет туралы» Заңға енгізіліп жатыр.
Айта кетейік, 1-5 қараша аралығында Алматыда креативті индустрия апталығы өтіп жатыр. Оның аясында көрмелер, перфоманстар, шеберлік сыныптары және көптеген басқа да іс-шара ұйымдастырылады. Бұған қоса, Тимур Бекмамбетовтың «ПРОФИЛЬ» фильмінің премьералық көрсетілімі, сонымен бірге, Алматы қаласы мен Алматы облысы тұрғындарының арасында Dota 2 түрінде Almaty Creative Week Esports Cup 2022 киберспорт турнирі өтеді.