Алматыда білім беру инфрақұрылымын дамыту бойынша қарқынды жұмыс жүргізіліп жатыр. Қала әкімінің орынбасары Азамат Қалдыбеков Өңірлік коммуникациялар қызметінің алаңында осылай деп хабарлады.
«Қазір Алматы қаласында 349 мектеп бар, онда 354 мыңнан астам оқушы білім алып жатыр. Халық саны жыл сайын 12–14 мың адамға өсіп жатқандықтан 33 мыңнан астам оқушы орны жетіспейді. Қабылданып жатқан іс-шаралардың нәтижесінде биыл бұл тапшылық 16 500 орынға дейін азаяды», – деді қала әкімінің орынбасары.
Шаһарда «Келешек мектептері» жобасы да үлкен қарқынмен ісе аса бастады. Бүгінгі таңда жалпы сыйымдылығы 34,8 мың оқушы орнын қамтитын 21 мектеп салынып жатыр.
Жоба аясында 12 600 орындық 8 жаңа мектеп салынып, пайдалануға берілді. Қазан айының соңына дейін тағы 10 500 орындық 5 мектептің ашылмақ. Сонымен қатар, жеке инвестициялар есебінен «сатып алу» тетігі арқылы салынған 11 700 орындық 8 мектеп биыл пайдалануға беріледі.
«Бұдан бөлек, 2025 жылдың соңына дейін 550 орындық бір мектепті ашып, жалпы сыйымдылығы 2 100 орынды 2 мектепті сатып алып, 6 мектепке жапсаржайлар салу жоспарланған. Бұл қосымша 1 795 орын береді», – деп атап өтті қала әкімінің орынбасары.
Қалада сонымен қатар 31 мектептің тізімі бекітілген «2025–2027 жылдарға арналған 1300 мектепті жаңалау» жобасы іске асырылып жатыр. Биыл 15 мектепте жөндеу-қайта жаңарту жұмыстары жоспарланған, олардың алтауында (№160, 73, 60, 50, 30 және 124) құрылыс жұмыстары басталып кетті. Келер жылы тағы 9 мектеп, 2027 жылы 7 білім беру нысаны жаңартылады.
Жаңарту бағдарламасын жүзеге асыру мектептердің жалпы сыйымдылығын шамамен 5 мың орынға арттырып, ғимараттардың сейсмотұрақтылығын күшейтіп, мұғалімдер мен оқушыларға жайлы жағдай жасауға мүмкіндік береді.
