Жастар саясаты арнайы ұйымдастырылған семинар барысында талқыланады.
Жастар ресурстық орталықтары қызметінің тиімділігін арттыру үшін не істеу керек? Бұл сұраққа жауап алу үшін жастар Алматыда өтіп жатқан семинарға қатысып жатыр, деп хабарлайды Almaty-akhamy.kz.
Семинардың бірінші күні Мемлекет басшысының «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауының негізгі бағыттарын, сондай-ақ оны іске асыру мәселелерін талқылауға арналды.
«Өңірлік жастар ресурстық орталықтарының қатысушылары мен басшылары Мемлекет басшысының жастарды қолдау жөніндегі бастамаларына ерекше назар аударды. Жастар білім, ғылым, цифрлық технологиялар, креативті индустрия және рухани-адамгершілік тәрбие сияқты маңызды әлеуметтік салаларда, сондай-ақ Жолдауды іске асыруда жас белсенділердің қатысу мәселелері бойынша өз пікірлерімен бөлісті», – делінген Ақпарат және қоғамдық даму министрлігінің баспасөз қызметінің хабарламасында.
Алдағы екі күн ішінде Мемлекет басшысы алға қойған жаңа міндеттерді ескеретіндей мемлекеттік жастар саясатының негізгі бағыттарын талқылау жоспарлануда.
Бірінші кезекте, жастар саясаты саласындағы жергілікті атқарушы органдар қызметінің тиімділігін өлшеудің маңызды құралына айналатын Жастардың дамыту индексі қаралады. Сондай-ақ, «Жастар» ҒЗО сарапшылары әзірлейтін NEET санатындағы жастарды анықтау мен есептеудің жаңа әдіснамасын зерделеу талқыланады.
ЖРО жұмысының сапасын арттыру мәселелеріне арналған семинар-тренинг Алматы қаласы Жастар саясатын дамыту мемлекеттік қорының алаңында өтуде.
Ұйымдастырушылардың айтуынша, барлық семинарлар санитарлық-эпидемиологиялық нормаларды қатаң сақтай отырып, «Ashyq» жүйесін пайдалана отырып өткізілуде.
