27-29 шілде аралығында Алматыда «Түнгі қаладағы балалар» республикалық жедел-алдын алу іс-шарасы өтіп жатыр. Алматы қалалық Полиция департаментінің Жергілікті полиция қызметі басқармасы бастығының орынбасары Айтан Елеусізов Өңірлік коммуникациялар қызметінде осы туралы баяндады.
Спикердің айтуынша, іс-шараның басты мақсаты кәмелетке толмағандар арасындағы құқықбұзушылықтың алдын алып, түнгі уақытта бақылаусыз жүрген балаларды анықтау, сондай-ақ Қазақстан Республикасының «Бала құқықтары туралы» заңын бұзғандарды жауапқа тарту екен.
Алматыда ювеналды полиция инспекторлары мен учаскелік полицейлерден тұратын арнаулы топтар құрылып, алғашқы күннің өзінде едәуір заңбұзушылық анықтаған:
• Кәмелетке толмаған 137 баланың сағат 23:00-ден кейін көшеде ата-анасыз жүргені анықталды. Ата-аналары Қазақстан Республикасы ӘҚБтК-нің 442-бабының 2-бөлігі бойынша әкімшілік жауапкершілікке тартылды;
• 163 жасөспірім мән-жайды анықтау үшін полиция басқармасына жеткізілді;
• 10 жасөспірім профилактикалық есепке қойылды;
• Кәмелетке толмағандар ішімдік ішкен 9 факт тіркелді;
• 6 ойын-сауық мекемесінің түнде балаларды кіргізіп, заң бұзғаны анықталды
«Ата-аналары әкімшілік жауапкершілікке тартылып, жасөспірімдермен әңгімелестік. Біз заң бұзған ойын-сауық орындарын да тіркеуге алып, әр істі қарап, қолға алып жатырмыз», - деді Айтан Елеусізов.
Түнгі рейдпен қатар, оқу орындарында, жастар орталықтары мен әлеуметтік желілерде түсіндіру жұмыстары жүргізіле бастапты. Онда балалар мен ата-аналарға іс-шараның мақсатын айтып, заң бұзған жағдайда жауапқа тартылатыны туралы ақпарат беріледі.
«Түнгі қаладағы балалар» - бұл бір реттік акция емес, балалардың құқығын қорғап, қараусыз қалудың алдын алып, үй-ішіндегі қолайсыздықтың, жасөспірімдер арасындағы қылмыстың алдын алу бойынша жасалып жатқан жүйелі жұмыстың бір бөлігі. Әсіресе жазғы демалыс кезінде мұндай рейдті үзбей өткізгелі отырмыз», - деп толықтырды өз сөзін Айтан Елеусізов.
Полицейлердің айтуынша, осы іс-шара алғашқы күннен-ақ айтарлықтай нәтиже берген. Қаладағы жағдайды бақылау күшейіп, әлеуметтік тұрғыдан қауіпті жағдайда тұрған отбасылармен жұмыс жанданды.