Алматы қаласы Білім басқармасының қолдауымен, жұмысшы мамандықтарының жылы қарсаңында жасөспірімдер арасында Jas Skills чемпионаты өтті. Бұл жобаның басты мақсаты – мектеп оқушыларына мамандық таңдау барысында бағыт-бағдар беру, өздерін әртүрлі салаларда сынап көруге мүмкіндік жасау, деп хабарлайды aqshamnews.kz
– Қазақстан халқына арнаған Жолдауында Президент Қасым-Жомарт Тоқаев экономикамыз үшін маңызды салаларда мамандар тапшылығын жою және кадр даярлаудың маңыздылығын атап өтті. Жұмысшы мамандықтары – кез келген қоғамның дамуының негізі. Олар күнделікті өмірімізде бізді қоршап тұрған ғимараттарды, жолдарды, жиһазды, киімдерді және басқа да көптеген заттарды жасайды. Jas Skills – жастарға өз шеберліктері мен дағдыларын көрсетуге мүмкіндік беретін беделді шара, – деп мәлімдеді Алматы қаласы Білім басқармасының басшысы Сайран Сайфеденов.
Бұл чемпионат бірнеше жылдан бері өткізіліп келеді, алайда биыл алғаш рет шара Алматы мемлекеттік бизнес колледжінің базасында ұйымдастырылды. Шаһардың 8-9-сынып оқушылары аспаздық өнерде өзара жарысты. Олар аспаздық шеберлік, наубайшылық, кондитерлік өнер және визуалды мерчендайзинг пен витринистика салаларында бақ сынады.
Қатысушылардың шеберлігін колледждің арнайы пәндер оқытушысы Жанар Қапасова және шақырылған тәуелсіз сарапшылар – оқу орнының түлектері, қазіргі таңда мейрамхана бизнесінде табысты жұмыс істеп жүрген шеф-аспаздар Антон Щербаков пен Абзал Исмаилов бағалады. Қазылар алқасы оқушылардың салат дайындау, бутерброд жасау және жеміс-жидектерден әсем композициялар жасау шеберліктеріне ерекше назар аударды.
– Мен мұндай чемпионатқа алғаш рет қазылық етудемін, – дейді Антон Щербаков. – Қазылар алқасы тағамдардың сапасы мен әсемдігіне ғана емес, сондай-ақ қатысушылардың тәртібіне де назар аударды. Бұл біздің саламызда өте маңызды. Оқушылардың көздеріндегі ынта-жігерді көріп, қатты қуандым. Егер олар болашақта кәсіби өмірлерін мейрамхана бизнесімен байланыстырса, мықты бәсекелестерге айналатынына сенімдімін. Қазіргі таңда бұл салада жаңа бастаушы мамандар үшін мүмкіндіктер өте көп.
Әр санатта жеңіске жеткен қатысушылар дипломдар мен грантқа колледжге түсуге мүмкіндік беретін сертификаттарға ие болды. Бұл олардың болашақ мамандықтарын таңдауда маңызды қадам болмақ.