Тәртіп сақшылары халықтан қарапайым сақтық шараларын сақтауды сұрайды.
Алматы полицейлері Instagram арқылы «сауда» жасаған екі алаяқты ұстады, деп хабарлайды Almaty-akshamy.kz Polisia.kz сайтына сілтеме жасап.
Алматының криминалдық полициясы Instagram желісінде бренд киімдерді сату сылтауымен адамдарды алдап кеткен екі жергілікті тұрғынды ұстады.
«Алаяқтық тізбегі өте қарапайым болды. Ұсталғандардың бірі – 25 жастағы И.есімді азамат әлеуметтік желіде мынадай екі парақша ашқан: «almaty.sneaker» және «top.sneakerkross». Түрлі-түсті суреттер мен жеңілдіктер туралы ақпаратты орналастырған. Оның 19 жастағы серіктесі болашақ сатып алушылармен байланысып, сәйкесінше, тапсырыстар мен төлемдерді қабылдаған. Алдын ала төлем бейтаныс адамның банктік картасына түсіп отырады. Ал пайданы олар екіге бөледі, – дейді Алматы қалалық ПД криминалдық полиция басқармасының бастығы Қуатбек Науатов.
Қаланың бес тұрғыны осындай алаяқтық тізбекке ілінген. Әр клиенттен алаяқтар кроссовка сатамын деп 15-тен 20 мың теңгеге дейін ақша алған. Ал арыз берушілер қаражатты аударғаннан кейін аяқ киімсіз және ақшасыз қалған.
Күдіктілерге қатысты ҚР ҚК-нің 190-бабы 2-бөлімі 4-тармағы (Алаяқтық) бойынша сотқа дейінгі тергеу жүргізілуде. Полиция интернетте жеңілдіктер мен тартымды бағалары бар түрлі-түсті аккаунттардың қолданушылар назарын аударатынын атап өтті. Әдетте, олардың көпшілігі тауарлардың қолда бар екеніне көз жеткізбестен, электронды әмиянға алдын ала төлемді аударады.