Қаламызда цирк өнерінің фестивалі осымен қатарынан екінші жыл өткізілуде.
Оған алыс-жақын 18 елдің үздік өнерпаздары қатысуда. Фестиваль Қазақ мемлекеттік циркінің 54 жылдығымен де байланыстырылған, деп хабарлайды aqshamnews.kz 24.kz арнасының ақпаратына сүйеніп.
Өнер мерекесіне қатысушылар мен жеңімпаздар Алматыда қалып, бір ай бойы әйгілі Қазақ мемлекеттік циркінің аренасында көрермендер алдында өнер көрсетеді.
Аталған фестиваль былтыр бірінші рет Алматыда ұйымдастырылған болатын. Халықаралық шара ұлттық цирк өнерінің жетістіктерін әлемге танытуға маңызды үлес қосуда. Қазақ мемлекеттік циркінің директоры Мақсат Жайықов ауқымды фестивальдің ұйымдастырылуы елімізде мәдени туризмнің белсенді дамуына ықпал ететінін атап өтті.
Мақсат Жайықов, Қазақ мемлекеттік циркінің директоры:
- Ең бастысы, жоғары деңгеде өтеді деп еңбек етіп жатырмыз. Жұмыс жасап жатырмыз. Біздің команда, кәсіби команда. Біріншіден, көрермендерге жақсы цирк қойылымын сыйлау, цирк өнерін халықаралық дәрежеде насихаттау, дәріптеу. Өз өнерімізді көрсету, Алматы қаласының көріктілігін көрсету, цирктің тарихын көрсету. Өзіміздің мәдениетімізді көптеген туристерге әріптестерге таныту.
