«QazaqGaz Aimaq» АҚ Алматы қаласындағы газ желілерін жаңғырту бойынша 2025 жылға арналған жоспарларын жариялады.
«QazaqGaz Aimaq» АҚ Алматы өндірістік филиалының өндірістік-техникалық бөлімінің бастығы Айбек Қасымов Өңірлік коммуникациялар қызметі брифингінде хабарлағандай, биыл желілерді қайта құру бойынша ауқымды жұмыстар жүргізілетін болады, деп хабарлайды aqshamnews.kz.
Спикердің айтуынша, мегаполисте газбен жабдықтау жүйесін қайта құруға бағытталған инвестициялық бағдарлама бекітілген.
Бағдарлама аясында 2024 жылы қаланың маңызды аудандарында – Алатау, Наурызбай, Түрксіб, Әуезов, Алмалы және Жетісу аудандарында 2 2 шақырым газ құбыры қайта жаңғыртылды. Бұл жұмыстар инфрақұрылымның қызмет ету мерзімін ұзартуға және жүйенің өткізу қабілетін арттыруға мүмкіндік береді.
Айбек Қасымовтың айтуынша, 2025 жылы жаңғырту жұмыстары жалғасады. Жоспарға сәйкес:
- орта және төмен қысымды 31,7 шақырым газ құбырын қайта құру;
- 11 шкафты газ реттеу пунктін (ШГРП) жаңарту;
- 13 электрохимиялық қорғаныс нысанын жаңғырту жұмыстары жоспарланған.
Бұл шаралар газбен жабдықтау сенімділігін арттыруға, пайдалану тәуекелдерін азайтуға бағытталған және қолданыстағы желілердің қызмет ету мерзімін ұзартуға мүмкіндік береді.
«Біздің міндетіміз - маусымға қарамастан Алматының әрбір тұрғыны үшін үздіксіз және қауіпсіз газбен жабдықтауды қамтамасыз ету. Қайта құру жұмыстарының арқасында біз газ құбырларының өткізу қабілетін арттырып, қаланың өсіп келе жатқан сұранысын қанағаттандырамыз», – деді компания өкілі.
Сонымен қатар, тұрғындар арасында қауіпсіздік деңгейін арттыру бойынша белсенді жұмыс жалғасуда. Бағдарлама шеңберінде компания қызметкерлері тұрғындарды тұрақты түрде газды пайдалану ережелері жайлы ақпараттандырып, жадынамалар таратады. Метро экрандарында бейнероликтер көрсетіліп, «112» қызметі арқылы қала тұрғындарының телефондарына қауіпсіздік шаралары туралы SMS-хабарламалар жіберіледі.