Марқұм өз-өзіне қол жұмсаған.
Кеше кешке Алматыда "Жастар" тұрғын үй кешеніндегі көпқабатты үйдің 11-қабатынан ер адам құлап, қайтыс болды, деп хабарлайды Almaty-akshamy.kz
Қалалық полиция департаменті бұл факті сотқа дейінгі тергеудің бірыңғай тізіліміне Қазақстан Республикасы Қылмыстық кодексінің 105-бабы ("Өзін-өзі өлтіруге итермелеу") бойынша тіркелгенін мәлімдеді.
"Алдын ала мәлімет бойынша, марқұм (1986 жылы туған) психикалық денсаулық орталығында тіркеуде тұрған", делінген Алматы полиция департаментінің баспасөз қызметінің мәліметінде.
Сондай-ақ полиция бір айдай бұрын, 8 маусымда ол өз-өзіне қол жұмсамақ болғанын айтты. Сол жолы Алмалы ауданының учаскелік инспекторлары 11-қабаттың терезесінде отырған 37 жастағы алматылық азаматты аман алып қалған. Инспекторлардың бірінің айтуынша, ер адам неге секірмекке әрекеттенгенін түсіндіріп бере алмаған.