Алматыда осымен үшінші рет экология мен инклюзияға арналған жылдағы InEco Fest 2026 фестивалі өтпекші, – деп хабарлайды aqshamnews.kz тілшісі.
Биылғы іс-шара «Бастау» деген атпен ұйымдастырылып, тұрақты даму, экологиялық мәдениет пен инклюзивті қоғам мәселесі төңірегінде экологиялық ұйымдарды, ғылыми қауымдастықты, бизнесті, қоғамдық қорлар мен қала тұрғындарының басын қоспақ. Алматы қаласының Өңірлік коммуникациялар қызметі алаңында фестивальді ұйымдастырушылар мен серіктестері осылай деп мәлімдеді.
ITeachMe қорының операциялық директоры Даурен Бекғожаевтың айтуынша, фестиваль экология ұғымын табиғатты қорғаумен ғана шектемей, оған кең ауқымда қарамақшы.
«Біз бір-бірімізге жанашыр болмасақ, қоршаған ортаға да қамқор бола алмаймыз. Сондықтан мүмкіндігі шектеулі жандар мен ерекше балаларды бағып отырған отбасылар фестивальға жай ғана қонақ болып келмей, оны ұйымдастыруға атсалысып, іс-шараның авторы да атанады», – деді спикер.
Бас ботаникалық бақтың маркетинг пен PR бөлімінің басшысы Баян Көспенбетова биылғы фестивальдің тақырыбы етіп «Бастау» деген сөзді әдейі таңдап алғандарын жеткізді. Бұл атау білімнің, шабыттың, күш-қуаттың, қолдау мен қоғамдағы оң өзгерістің символын білдіреді.
Оның сөзінше, жыл сайын ғалымдарды, экологтарды, еріктілер мен қоғамдық ұйымдардың басын қосатын фестивальдің негізгі алаңы Бас ботаникалық бақ болмақ. Келушілер үшін тегін шеберлік сабағын, сарапшылар дәрісін, экологиялық ойын, шығармашылық шеберханалар мен интерактивті алаңдарды қамтитын ауқымды отбасылық бағдарлама әзірленген.
«Фестивальден жақсы әсер ғана алып қайтпай, күнделікті өмірде қолдана алатын жаңа білім де қоса алып қайтса дейміз», – дейді Баян Көспенбетова.
Chevron компаниясының қоғаммен байланыс жөніндегі кеңесшісі Жанар Көшпанова фестивальдің қоғамды тұрақты дамыту үшін білім беруді, ынтымақтастықты, табиғи ресурстарға жауапкершілікпен қарау мен азаматтарды оң өзгеріске тартуды мақсат етіп отырғанын айтты.
Оның сөзінше, балалармен, отбасымен жұмыс істеуге көп көңіл бөлген. Өйткені экологиялық әдет пен қоршаған ортаға жауапкершілікпен қарау мәдениеті дәл осы балалық шақта қалыптасады екен.
«Мама Про» қорының зерттеу мен адвокация жөніндегі үйлестірушісі Айнұр Құдайбергенова фестивальдің инклюзивті құрамдас бөлігінің маңыздылығына тоқталды.
«Фестиваль қонақтары инклюзия тақырыбына кеңірек көзқараспен қарап, оны қоғамымызды мейірімдірек, мықтырақ әрі адамгершілігі жоғары етуге мүмкіндік ретінде қабылдайды деп үміттенеміз. Себебі бір-бірімізге қамқор болу – экологиялық мәдениеттің де ажырамас бөлігі», – деді ол.
GreenUp.kz (Recycle Birge) қоғамдық қорының директоры Әлия Сәлменова фестиваль аясында «Экологиялық өмір салты» атты арнаулы аймақ ұйымдастырылатынын хабарлады. Онда келушілерге қалдықты сұрыптау, қайта өңдеу, саналы тұтыну мен әр адамға қолжетімді қарапайым экологиялық әдет туралы ақпарат береді.
«Біз экологияны түрлі шектеулер жиынтығы ретінде емес, күнделікті өмірдің табиғи бөлігі ретінде көрсеткіміз келеді. Егер фестивальден кейін әр адам өзімен бірге кем дегенде бір жаңа экологиялық әдетті алып кетсе, біз үшін бұл үлкен жетістік болмақ», – деп атап өтті ол.
Ұйымдастырушылар фестиваль биыл да қаланың ең ірі қоғамдық алаңдарының біріне айналады деген ойда. Өткен жылы InEco Fest фестиваліне 4 мыңнан астам адам қатысты. Олардың қатарында балалы отбасылар, оның ішінде мүмкіндігі шектеулі балаларды тәрбиелеп отырған отбасылар, мектеп оқушылары, студенттер, жас мамандар, ғылыми қауымдастық өкілдері мен қалалық қоғамдық бастаманың белсенділері болды.
Фестиваль аясындағы барлық іс-шаралар, соның ішінде шеберлік сабақтары, дәрістер, концерттер мен театрлық перформанс келушілер үшін тегін өтеді. Қатысу үшін тек қолданыстағы тариф бойынша Бас ботаникалық баққа кіру билетін сатып алсаңыз болды. Ал алты жасқа дейінгі балалар мен мүмкіндігі шектеулі жандарға кіру тегін болып қала береді.