Алматыда демалыс күндері өтетін жәрмеңкелерді заманауи форматқа көшіру арқылы жаңғырту жұмыстары басталады. Бұл туралы Алматы қаласы әкімінің орынбасары Олжас Смағұлов Өңірлік коммуникациялар қызметінде өткен брифинг барысында мәлімдеді, – деп хабарлайды aqshamnews.kz тілшісі.
Жаңғырту жұмыстары Бостандық және Әуезов аудандарында қолға алынады. Жоба аясында инфрақұрылымды жаңарту, сондай-ақ сатып алушылар мен кәсіпкерлер үшін қолайлы жағдай жасау көзделіп отыр.
Қалада демалыс күндері өтетін жәрмеңкелер азық-түлік бағасының қолжетімділігін қамтамасыз етудің маңызды тетіктерінің бірі болып қала береді. Биыл мыңнан астам жәрмеңке өткізу жоспарланған. Бұл былтырғы жылмен салыстырғанда 2,5 есеге көп.
Фермерлер мен отандық тауар өндірушілердің өнімдері делдалсыз, тікелей жеткізілетіндіктен, тауарлар орташа нарықтық бағадан 5-15%-ға төмен бағамен ұсынылады.
Жаңғырту аясында жәрмеңке алаңдары қаланың дизайн-кодына сәйкес бірыңғай сәулеттік стильде рәсімделеді. Жобада жабық және ашық сауда павильондары, мүмкіндігі шектеулі азаматтарға бейімделген санитарлық торап, автотұрақ, аялдама кешендері, қоғамдық тамақтану орындары мен көріктендірілген қоғамдық кеңістіктер қарастырылған.
Пилоттық жоба ретінде «Қазақфильм» шағынауданындағы жәрмеңке алаңы таңдалды. Бұл аумақта шамамен 100 сауда орны орналастырылып, сауда павильондары жаңартылып, айналасы көркейтіледі. Жұмыстарды биылғы мамыр айында аяқтау жоспарланып отыр. Қайта жаңарту кезеңінде жәрмеңке уақытша сол аумақтағы автотұрақта жұмыс істейді.
110 сауда орнына есептелген екінші жәрмеңке алаңы Өтеген батыр көшесі бойында (Абай даңғылының қиылысы маңында) орналасады. Бұл жоба да мамыр айында іске қосылмақ. Құрылыс және жаңғырту жұмыстары жүріп жатқан кезеңде Әуезов ауданындағы жәрмеңке уақытша Таугүл-1 шағынауданында, Пятницкий мен Шалов көшелерінің қиылысында ұйымдастырылады.
Алдағы уақытта коммуналдық жәрмеңкелер желісін қаланың барлық аудандарын қамти отырып кеңейту жоспарланған.
Жобалар жеке инвестиция есебінен жүзеге асырылады. Сонымен қатар жәрмеңкелердің әлеуметтік сипаты сақталады:кәсіпкерлер мен жергілікті өндірушілер үшін қолайлы шарттар ұсынылады, қазіргі қатысушыларға сауда орындары бекітіледі.
Жаңартылған нысандар пайдалануға берілгеннен кейін жәрмеңкелерді басқару және ұсынылатын бағаның сақталуын «Алматы» әлеуметтік-кәсіпкерлік корпорациясы» АҚ бақылайды.
Жаңартылған алаңдардың ашылу мерзімі құрылыс жұмыстары аяқталғаннан кейін қосымша хабарланады.