Фестивальге колледж студенттері мен арнайы білім беру ұйымдарының тәрбиеленушілері қатысты, деп хабарлайды aqshamnews.kz тілшісі.
Алматыда еліміздің әр өңірінен келген есту қабілеті бұзылған дарынды жастардың басын қосқан «DEAF MADE – 2026» республикалық инклюзивті фестивалі өтті. Оған Алматы, Шымкент және Қарағандыдағы білім беру ұйымдарынан 50 қатысушы, сондай-ақ 19 жетекші мен бірге келген өкіл қатысты.
«Шығармашылық тілі. Тең мүмкіндік кеңістігі» ұранымен өткен фестиваль ерекше білім беру қажеттілігі бар жастардың шығармашылық қабілетін, кәсіби шеберлігі мен жетістіктерін көрсетуге мүмкіндік берді.
Іс-шараны Алматы қаласы білім басқармасына қарасты Алматы технология және флористика колледжі ұйымдастырды. Фестивальге колледж студенттері мен арнайы білім беру ұйымдарының тәрбиеленушілері қатысты. Байқау бағдарламасы офлайн және онлайн форматта өтті.

Қатысушылар жұмысын бірнеше номинация бойынша ұсынды. «Біздің бренд» байқауында командалар жетістігі мен тың идеясын таныстырса, «Овация» номинациясында хореографиялық шеберлігін көрсетті. Ал «Ән мен ым-ишара» бағыты бойынша музыкалық шығармаларды ым тілінде орындады.
Фестивальдің жарқын сәттерінің бірі «Заманауи этностиль» сән көрсетілімі болды. Онда қатысушылар ұлттық дәстүрлер мен заманауи дизайнерлік шешімдерді үйлестірген бірегей киім топтамаларын ұсынды. Сонымен қатар жас шеберлердің шығармашылық әлеуеті мен кәсіби дағдысын танытатын авторлық және қолдан жасалған бұйымдар көрмесі ұйымдастырылды.
Байқау қорытындысы бойынша «Біздің бренд» номинациясында Алматы технология және флористика колледжі бірінші орын алды. «Овация» хореографиялық бағыты бойынша Алматы сервис және технологиялар колледжі жеңімпаз атанды. Ал «Заманауи этностиль» номинациясында Алматы қаласындағы №5 арнайы (түзету) мектеп-интернатының командасы үздік деп танылды.
Жүлделі орындарға Алматы қаласындағы №1 және №7 арнайы мектеп-интернаттарының, Шымкент қаласындағы Энергетика және байланыс колледжінің, Қарағанды жоғары инжиниринг колледжінің және Қарағанды технология және сервис колледжінің командалары да ие болды. Жеңімпаздар мен жүлдегерлерге алтын, күміс және қола медаль табысталды.