Алматыда төрт жасар бүлдіршінге зәбір көрсеткен тәрбиеші сотталды. "Ахляк" деп аталатын жекеменшік балабақшаның қызметкері кінәсін толық мойындап, қатты өкінетінін айтып, кешірім сұрады. Енді ол 4 жылға бас бостандығынан айырылып, он жыл бойы балалармен жұмыс істеуге тыйым салынды, - деп хабарлайды Аqshamnews.kz тілшісі "КТК" телеарнасына сілтеме жасап.
Қылмыстық іс "Азаптау" бабы бойынша қаралды. Прокурор айыпталушыны 6 жылға бас бостандығынан айыруды сұраған. Тәрбиеші кінәлі деп танылып, сот залында қамауға алынды. Ол енді қауіпсіздігі орташа түзету мекемесіне төрт жылға аттанады. Жәбірленушінің отбасына материалдық өтемақы төлеуге де міндеттелді.
Еске салайық, ақпанда әлеуметтік желіде тараған бейнежазба жұрттың жағасын ұстатқан еді. Онда бөбекжай қызметкері баланы тұншықтырып, жерде сүйреп бара жатқаны анық көрінген. Айта кетейік, бұл мекеме ресми базада тіркелмеген, лицензиясыз жұмыс істеп келген жекеменшік мекеме болған.
"Сот шешімімен толық келісем. Бұл тек менің балама емес, бүкіл балабақшалардағы балаларға қатысты. Қазір балаларға қатысты зорлық-зомбылық, қорлау жиілеп кетті. Соған байланысты бұл бәріне сабақ болса деймін", - дейді баланың әкесі Абылай Рахатов.