Өңірлік коммуникациялар қызметі алаңында Қазақстандағы Ғылым күні мен әлеуметтік-гуманитарлық зерттеулерді дамытудың болашағына арналған баспасөз конференциясы болып өтті, – деп хабарлайды aqshamnews.kz тілшісі.
Әл-Фараби атындағы Қазақ ұлттық университетінің педагогика ғылымдарының докторы, профессоры Акмарал Магауова инклюзивті білім беру бүгінгі таңда мемлекеттік білім беру саясатының негізгі стратегиясының бірі әрі әділетті де тұрақты қоғам қалыптастырудың маңызды шарты екенін мәлімдеді.
Спикердің айтуынша, қазіргі білім беру жүйесі тұлғаны дамыту мен баршаға тең мүмкіндік ұсынуға бағытталған жаңару кезеңін бастан өткеріп жатыр. ЮНЕСКО мен Біріккен Ұлттар Ұйымы құжаттарында бекітілген инклюзивті тәсіл ашық әрі төзімді қоғам құрудың негізі ретінде қарастырылады.
«Қазіргі әлем жаңа білім беру парадигмасына көше бастады, оның орталығында адам мен оның дамуы тұр. Инклюзивті білім беру осы жүйенің ажырамас бөлігіне айналып барады. Ол білім мен мүмкіндікке әр адамның бірдей қолы жететін қоғам қалыптастыруға ұмтылады», — дейді спикер.
Қазақстан халықаралық тәсілді, соның ішінде 2008 жылы ратификацияланған БҰҰ-ның Мүгедектердің құқығы туралы конвенциясы ережесін белсенді түрде енгізе бастады. Ұлттық заңнама барлық азаматтың, әсіресе ерекше білім беруге мұқтаж жандардың білім алу құқығын да қамтамасыз етеді.
«Инклюзивті білім беру әлемдік қауымдастық тарапынан теңдікті қамтамасыз етудің тиімді тетігі ретінде мойындалған. Қазақстанда бұл білім беру жүйесін дамытудың заңды кезеңіне айналып, инклюзивті қоғам құруға деген ұмтылыс пен беталысты көрсетеді. Мемлекет әр адамның білім алу құқығын жүзеге асыруы үшін жағдай жасап жатыр», — деп атап өтті спикер.
Қазіргі таңда елде инклюзивті жоғары білім беру жүйесі қалыптасып келеді. Бұл мүмкіндігі шектеулі жандарға мамандық алып, қоғамға кірігуге жол ашады. Білім және ғылым министрлігінің мәліметіне қарағанда, қазір жоғары оқу орыннында 1400-ден астам мүгедектігі бар студент білім алып жатыр. Олардың арасында ең сұранысқа ие бағыттар — педагогика, әлеуметтік жұмыс, құқықтану, экономика мен ақпараттық технологиялар екен.
«Ерекше білім беруге мұқтаж адамдар үшін білім беру — әлеуметтенудің маңызды құралы. Ол әлеуметтік мәртебені арттырып, кәсіби өсуге мүмкіндік береді. Сондықтан инклюзивті жоғары білімді дамыту – басым міндеттің бірі», — деді Акмарал Магауова.
Мемлекеттік саясат аясында кедергісіз орта қалыптастыру, бейімделген білім беру бағдарламаларын әзірлеу мен жеке оқу траекторияларын енгізу бойынша жұмыс істеліп жатыр. Студенттерді психологиялық-педагогикалық қолдауға, олардың әлеуметтік және кәсіби бейімделуіне көп көңіл бөлінген.
«Білімге қолжетімділікті қамтамасыз ету ғана емес, студенттердің табысты бейімделуіне жағдай жасау да маңызды. Бұл білім беру, психологиялық, әлеуметтік және медициналық қолдауды қамтиды. Тек кешенді тәсіл ғана шынайы инклюзияға қол жеткізуге мүмкіндік береді», — дейді ол.
Сонымен қатар, Қазақстанда ерекше білім беру қажеттілігі бар студенттердің өзін-өзі кәсіби айқындауын қалыптастыруға бағытталған ғылыми жоба жүзеге асырыла бастады. Оның аясында зерттеулер, тренингтер мен оқытушыларға арналған біліктілікті арттыру курстары өткізіліп жатыр.
Сарапшылардың пікірінше, инклюзивті білім беруді дамыта түсу үшін білім беру бағдарламасын жетілдіріп, инфрақұрылымды кеңейтіп, студенттерді қолдауды күшейте түсу қажет. Қолжетімді орта құру, әлеуметтік-мәдени оқыту моделін енгізу мен студенттердің жоғарғы оқу орнының қоғамдық өміріне қатысу деңгейін арттыру басым бағыттың бірі болып қалды.
Кездесу қорытындысы бойынша, инклюзивтілік Қазақстан қоғамының дамуының негізгі қағидаттарының біріне айналып келе жатқаны, ол әр азаматқа оның ерекшеліктері мен өмірлік жағдайына қарамастан тең мүмкіндік беретіндігі атап өтілді.