Алматының №2 Перинаталдық орталығында биылғы алғашқы үшем өмірге келді, – деп хабарлайды aqshamnews.kz тілшісі.
Алматының № 2 қалалық перинаталдық орталығында 2026 жылы алғашқы үшем туды. Биыл 7 мамыр күні бір отбасында бірден үш қыз сәби өмірге келген. Олар ерлі-зайыптылардың үшінші, төртінші және бесінші балалары атанды. Бұған дейін отбасы екі бала тәрбиелеп отырған. Бұл туралы Қоғамдық денсаулық сақтау басқармасының өкілдері хабарлады.
Сәбилер жүктіліктің 35-аптасында кесарь тілігі арқылы дүниеге келген. Жаңа туған нәрестелердің салмағы 1399, 1694 және 1677 грамм болған.
Туғаннан кейін қыздар жаңа туған нәрестелердің жансақтау бөлімінде болып, үш күн бойы қажетті медициналық көмек пен СИПАП аппараты арқылы тыныс алды.
Қазіргі уақытта балалар анасымен бірге бір палатаға ауыстырылған. Дәрігерлердің айтуынша, сәбилердің жағдайы тұрақты әрі олар мамандардың бақылауында.
2026 жылдың басынан бері бұл №2 қалалық перинаталдық орталықта дүниеге келген алғашқы үшем. Бұған дейін орталықта 41 егіз жарық дүние есігін ашқан.
Жаңа туған сәбилердің анасы орталықтың медицина қызметкерлеріне көрсеткен көмегі мен қолдауы үшін алғыс білдірді.
«Медбикелер мен дәрігерлер әрдайым көмектесіп, қолдау көрсетеді. Бізге үлкен көңіл бөлді», — деді үшемнің анасы.
Айта кетейік, көпұрықты жүктілік дәрігерлер тарапынан ерекше бақылау мен жүктілік және босанудан кейінгі кезеңде мұқият қадағалауды талап етеді. Мұндай жүктілікті жүргізу — акушер-гинекологтар, анестезиологтар, акушерлер мен неонатологтардың үйлесімді әрі кәсіби жұмысының нәтижесі.