Алматы қаласында жыл басынан бері қылмыс деңгейі 10-15%-ға төмендеді, деп хабарлайды aqshamnews.kz
Қалалық полиция департаментінің мәліметінше, құқық бұзушылықтардың басым бөлігі қаланың әртүрлі жерлеріне орнатылған 150 мыңға жуық бейнебақылау камераларының арқасында ашылды. Бұл заманауи технологиялар оқиғаларға жедел әрекет етуге және құқық бұзушылықтардың алдын алуға мүмкіндік беруде.
Күн сайын полиция қызметкерлері қоғамдық тәртіпті сақтау және азаматтардың қауіпсіздігін қамтамасыз ету үшін көшелерде қызмет атқарады. Қылмыстарды ашу, профилактикалық рейдтер өткізу, түсіндіру жұмыстарын жүргізу және қоғамдық орындар мен жолдардағы тәртіпті бақылау тұрақты түрде жүзеге асырылуда.
Алматы қаласы полиция департаментінің жергілікті полиция қызметі басқармасының бастығы Серік Шумаев былай деді: "Жыл басынан бері патрульдік полиция қызметкерлері 2000-нан астам қылмыстық құқық бұзушылықты ашуға қатысты. Алдағы Тәуелсіздік күні мен Жаңа жыл мерекелері қарсаңында патрульдік полиция гарнизоны мен Полиция департаменті күшейтілген жұмыс режиміне көшеді."
Алматы қаласының полиция департаменті заманауи технологияларды енгізуді және азаматтардың қауіпсіздігін қамтамасыз ету үшін профилактикалық шараларды жалғастыруда. Қала тұрғындарының қауіпсіздігі – басты назарда.