Алматыда жұмыс сапары аясында қалалық Қоғамдық денсаулық сақтау басқармасының басшысы Марат Пашимов «Алау» балаларды оңалту орталығына барып, ғимаратта жүргізіліп жатқан күрделі жөндеу жұмыстарының барысымен танысты, – деп хабарлайды aqshamnews.kz тілшісі.
«Алау» орталығы – қаладағы балаларды оңалтумен айналысатын ең көне медициналық мекемелердің бірі. 1982 жылы ашылғаннан бері ол түрлі аурудан кейін балалардың денсаулығын қалпына келтіруге көмектесіп келеді және ондаған жыл бойы Алматыдағы балаларға медициналық көмек көрсету жүйесінің маңызды бөлігіне айналған.
Орталық пульмонологиялық және соматикалық аурулары бар, сондай-ақ орталық жүйке жүйесі зақымданған балаларды оңалту еміне маманданған. Кішкентай пациенттер қажетті медициналық көмекті тегін алады. Орталыққа жатқызу Госпитализация бюросының порталы арқылы жүзеге асырылады.
Сапар барысында Марат Пашимов құрылыс жұмыстарының барысымен танысып, орталық ғимаратын аралап көрді. Сондай-ақ, медициналық ұйым басшылығымен оңалту қызметін одан әрі дамыту жоспарын талқылады.
Ғимаратты күрделі жөндеу жұмыстары 2025 жылы қыркүйекте басталған. Жөндеу жұмыстарын 2026 жылы маусымда аяқтау жоспарланып отыр. Қайта жаңғыртудың негізгі мақсаты — балаларды емдеу мен оңалту үшін заманауи, қауіпсіз әрі жайлы орта қалыптастыру.
Жаңғырту аясында инженерлік коммуникациялар жаңартылып, ішкі жөндеу жүргізілуде. Сонымен қатар медициналық кабинеттер мен ем-шара бөлмелері жаңғыртылып жатыр. Балалар мен олардың ата-аналары үшін қолайлы жағдай жасауға, сондай-ақ оңалту кеңістіктері мен медициналық жабдықтарды жаңартуға ерекше көңіл бөлініп келеді.
Жөндеу жұмыстары аяқталғаннан кейін «Алау» орталығы бұрынғыдан да заманауи әрі функционалды медициналық мекемеге айналады. Медициналық оңалту мүмкіндіктерін кеңейту, қалпына келтіру емінің жаңа әдістерін енгізу және кішкентай пациенттер үшін барынша қолайлы жағдай жасау жоспарланып отыр.
Бүгінде орталық өзінің басты миссиясын — балаларға оңалту емінен өтуге көмектесу, олардың денсаулығын нығайту және белсенді өмірге қайта оралуына қолдау көрсету жұмыстарын жалғастыруда. Мұнда жыл сайын медициналық оңалтуды қажет ететін жүздеген бала ем алады.
Орталықтағы күрделі жөндеу жұмыстары Алматыдағы балаларды оңалту жүйесін дамытудағы маңызды қадам болмақ. Бұл балалар мен олардың отбасылары үшін көрсетілетін медициналық қызметтердің сапасын айтарлықтай арттыруға мүмкіндік береді.