Алматы қаласының әкімі Дархан Сатыбалды жұмыс сапары барысында «Атакент» қазақстандық іскерлік ынтымақтастық орталығын қайта құру жобасымен танысты.
Сапар аясында нысанның іскерлік тартымдылығын арттыруға және жайлы қоғамдық ортаны құруға бағытталған кешенді жаңғырту жоспары ұсынылды. Жобада аумақты абаттандыруға, көгалдандыруға және заманауи урбанистік шешімдерді енгізуге ерекше назар аударылды.
«Атакенттің» субұрқақ кешені қаладағы ең көрікті орындардың біріне айналуы керек. Бұл жобаның жүрегі болмақ», - деді Дархан Сатыбалды.
Сонымен қатар, ол жұмыстың мерзімі мен сапасын сақтаудың маңыздылығын атап өтті.
Қайта құру 2025 жылғы шілдеден бастап кезең-кезеңімен жүргізіледі. 74 мың м² жол мен тротуарды көріктендіру, 170 мың м² жасыл аймақты абаттандыру, жарық шамдары, көше жиһаздары, спорт алаңдары, модульді әжетханалар мен автоматтандырылған суару жүйесін орнату жоспарланған.
Қала басшысы ағаш таңдағанда әртүрлі болуына мән беріп, Алматының климаттық ерекшеліктеріне сай жапырақты ағаш түрлерін отырғызуды айтты.