Әбілхан Қастеев атындағы Ұлттық өнер музейінің төрінде «Армения палитрасы» атты көрме ашылды, – деп хабарлайды aqshamnews.kz тілшісі.
Экспозицияға отызға жуық туынды қойылған.
Ұлттық өнер музейі ұзақ жылдардан бері өз қорында армян өнерінің көркемдік деңгейі жоғары ауқымды коллекцияны сақтап келеді. Бүгін сол картиналардың бірқатарын көпшілік назарына ұсынатын сәт туыпты.
Армения Республикасының Қазақстан Республикасындағы Елшілігі мен Армения Республикасының Алматы қаласындағы Құрметті консулдығының қолдауымен ашылған көрменің салтанатты рәсімінде алғашқы сөзді Әбілхан Қастеев атындағы Ұлттық өнер музейінің директоры Гүләйім Жұмабекова алды. Ол жылы лебізін білдіріп, Қазақстан Республикасы Премьер-Министрінің орынбасары – Мәдениет және ақпарат министрі Аида Балаеваның құттықтауын оқып берді. «Қазақстан мен Арменияны екі халықтың мәдениеті мен дәстүрін өзара құрметтеуге негізделген көпжылдық қарым-қатынастар байланыстырады. Мұндай жобалар бірлескен жұмыстарға негіз қалайды. Баршаңызға экспозициядан жарқын әсер алуларыңызды тілеймін», – делінген құттықтау хатта.
Сөз алған Армения Республикасының Қазақстан Республикасындағы елшісі Армен Гевондян да өз ілтипатын жеткізді.
– Көрмені ашу мен үшін үлкен мәртебе. Бұл жай ғана картиналардың көрмесі емес, елдер арасындағы достықтың дәлелі. Өзге халықтың өнер туындыларын көрсету – оның мәдениеті мен дәстүріне деген құрметтің белгісі, – деді елші Армен Гевондян.
Экспозиция арасында әлемдік теңіз пейзажы өнерінің аса көрнекті өкілдерінің бірі шебері Иван Айвазовскийдің «Кешкі дұға» және «Чумактар керуені» атты екі туындысы бар. Екеуі де бұған дейін де көрмеге қойылғанымен, көпшілікке өте сирек көрсетіледі.
«Армения палитрасында» Мартирос Сарьян, Минас Аветисян, Дмитрий Налбандян, Мариам Асламазян, Александр және Лавиния Бажбеук-Меликян, Эдуард Исабекян, Оганес Зардарян, Григор Ханджян, Роберт Элибекян секілді суретшілердің де жарқын бояулы шығармаларын көруге болады.
– Бұл біздің музейдегі армян суретшілерінің алғашқы көрмесі емес. Бұған дейін 2017 жылы осындай экспозиция ұйымдастырған едік. Ол көрермендердің үлкен қызығушылығын тудырды. Біздің қорда көркемдік құндылығы жоғары армян өнері туындыларының маңызды топтамасы сақталған. Жинақтың негізгі бөлігі сонау 1960–1970 жылдары көрме жұмыстары, музейаралық мәдени алмасу тәжірибесі және көркемөнер ұйымдарынан келіп түскен туындылар есебінен қалыптасты, – дейді көрме кураторы Бибігүл Құсайынова.
Көрмеден орын алған «Қара шашты ару», «Бюракандық қария мен Артаваздик ғибадатханасы», «Қызғылт көйлекті қыз», «Колхозшы әйелдер» картиналары да өз дәуірінің бейнесін көрсетеді. Экспозициядан пейзаж, портрет, натюрморт және тақырыптық композициялармен қатар, мүсіндер мен сәндік-қолданбалы өнер туындыларын да көруге болады. Әр шығарма келушілерге армян мәдениеті мен өнерінің сан қырын таныстырады.
Ұсынылған коллекция армян шеберлерінің жоғары кәсіби деңгейін ғана емес, өзара құрметке, шығармашылық ықпалдастыққа және ортақ мәдени мұраны сақтауға негізделген Қазақстан мен Армения арасындағы көпжылдық мәдени байланыстарды да паш етеді.
Нұржамал ӘЛІШ