Әлемге әйгілі Флавио мен Бруно Тони жетекшілік ететін итальяндық Belissimo циркі Қазақ мемлекеттік циркінде гастрольдік бағдарламасын бастайды.
Belissimo – Италия рухын сезіндіретін ерекше цирк шоуы. Мұнда жоғары деңгейдегі өнер, талғампаз стиль және итальяндық темперамент тоғысады. Еуропалық дәстүрде қойылған бағдарлама әлемнің түрлі елінде үлкен табысқа жетіп, көрермендерді тәнті етті.
Алматы циркінің аренасында көрермендерге әсерлі әрі ауқымды бағдарлама ұсынылады: бенгал және ақ жолбарыстар, сондай-ақ Орталық Азияда тұңғыш рет көрсетілетін сирек алтын жолбарыстар; үш мәрте сальто-мортале орындайтын жоғары деңгейдегі акробаттар; жылқылардың өнері; шебер эквилибристер мен епті жонглерлердің қойылымдары; арқан үстінде өнер көрсететін канатоходшылар; итальяндық нәзік әзілге құрылған сайқымазақ бағдарламасы; қарқынды музыкалық сүйемелдеу мен заманауи сахналық безендіру.
Флавио мен Бруно Тони – әйгілі цирк әулетінің өкілдері. Олардың өнері жоғары кәсібилігімен, айрықша артистизммен және көрерменмен шынайы байланыс орната білуімен ерекшеленеді. Бұл цирк Монте-Карлода өткен халықаралық цирк фестивалінде бес мәрте жүлде (алтын және күміс марапаттар) алған. Балаларға да, ересектерге де ерекше әсер сыйлайтын бағдарлама бүкіл отбасыға арналған.
Итальяндық Belissimo циркінің Алматыдағы гастрольдері – еуропалық цирк мәдениетін тамашалап, мерекелік көңіл күйге бөленіп, әлемдік деңгейдегі бірегей шоуды көруге берілген сирек мүмкіндік.
Қазақ мемлекеттік циркі барша өнерсүйер қауымды жарқын эмоция мен нағыз ғажайыпқа толы кешке шақырады!
Бағдарлама 14 ақпанда басталып, 24 наурызға дейін жалғасады.
Билеттер Ticketon сайтында.