Алматыда қалың қардан кейін көшелерді үздіксіз тазалау жұмыстары жалғасып жатыр.
Қар 16 қаңтар күні таңертең басталып, «Қазгидромет» РМК болжамына сәйкес, бірде тоқтап, бірде жауып 18 қаңтардың таңына дейін жалғасады. 17 қаңтар сағат 08:00-дегі жағдай бойынша қалаға 15 см-ден астам қар түсті. Бұл туралы Алматы қаласының Коммуналдық инфрақұрылым және тұрғын үй инспекциясы басқармасының өкілдері айтты.
Метеорологиялық станциялардың дерегіне сәйкес, қар жамылғысының биіктігі мынадай: Авиациялық метеостанция «Әуежайда» — 11 см, «Каменск үстірті» метеостанциясында — 38 см, «Шымбұлақ» метеостанциясында — 49 см. Коммуналдық қызмет қар жауа бастаған сәттен бастап күшейтілген тәулік бойы жұмыс режиміне көшкен. Жұмыстарға 2,8 мыңнан астам жол саласы жұмысшысы және 1 250 бірлік арнайы техника жұмылдырылған.
Қозғалыс қауіпсіздігін қамтамасыз ету үшін 75 жедел бригада жұмыс істеп, ылди, дөң және жолайырықтарға көктайғаққа қарсы қоспа себілген. Қар басталғанға дейін жолға алдын ала көктайғаққа қарсы реагенттер және арнайы қоспалар себілді. Бұл қар қалың жағдайда да мұз қатпай, көліктің тепе-теңдігін сақтауға мүмкіндік берді. Кейбір учаскеде қардың жиналуы ұзаққа созылған жауын-шашын мен температураның ауытқуына байланысты, соның салдарынан қардың еріп-қату үдерісі жүрген.
Шағын көлемді арнайы техника тротуарлар мен қоғамдық кеңістіктерді техника көмегімен тазартып жатыр, ал қоғамдық көлік аялдамалары, жерүсті өткелдері, баспалдақтар мен пандустар қолмен тазалануда. Түнгі уақытта екі кезеңмен қар сырып тазалау жүргізіліп, жаппай қар шығару ұйымдастырылды. Қаланың негізгі магистральдары мен қоғамдық аумақтарынан 3 мың текше метрден астам қар шығарылды. Тазалау кезінде қоғамдық көлік бағыттарына, медициналық және білім беру нысандарына кіреберістерге, сондай-ақ жүргіншілер қозғалысы қарқынды учаскелерге басымдық беріледі. Кезекші бригадалар жолдың жай-күйін тәулік бойы бақылап, қажет болған жағдайда ең күрделі бағыттарда жұмыстарды жедел күшейтеді.
Қалалық қызмет жүргізушілерден мүмкіндігінше көлігін жол жиегінде қалдырмауды және арнайы техниканың қозғалысына кедергі келтірмеуді сұрайды. Тұрғындардың қолдауы көшелерде қауіпсіз әрі жайлы қозғалысты тезірек қамтамасыз етуге мүмкіндік береді. Жағдай жауапты бөлімшелердің тұрақты бақылауында, бұл жұмыс қала қардан толық тазарғанға дейін жалғасады.
