Алматыда «Boxy Wealth» атауымен жұмыс істеген қаржы пирамидасына қатысты тергеу аяқталып, іс сот қарауына жіберілді, – деп хабарлайды aqshamnews.kz тілшісі.
Қаржы мониторингі агенттігінің мәліметінше, күдікті бір жыл бойы Алматы аумағында осы жобаның бөлімшесін басқарып келген. Тергеу барысында платформаның www.boxywealth.com сайты мен мессенджерлер арқылы жұмыс істегені анықталған.
Әуелі «Күнделікті табыс» чатында халық тұтынатын тауарлар туралы ақпарат жарияланып, кейін сол арқылы азаматтарды инвестициялық жобаға тарту жүзеге асырылған.
Жобаға қосылу үшін қатысушыларға әртүрлі пакеттің бірін сатып алып, күн сайын жарнамалық материалдарды көру ұсынылған. Есесіне оларға тәулігіне 5–10 пайызға дейін табыс түсетіні айтылған.
Бұдан бөлек, жаңа адамдарды тартқандарға бонус беретін рефералдық жүйе де қолданылған. Салымшылардан түскен қаражат жеке тұлғалардың, яғни дропперлердің шоттарына қабылданып, кейін P2P операциялары арқылы криптовалютаға айналдырылып отырған.
Тергеу дерегіне сүйенсек, сенім ұялату үшін компания ресми тіркеліп, кеңсе ашылған, жарнама жүргізілген. Сондай-ақ, «табыс» көрсеткіштері көрсетіліп, салымшыларға түрлі кеңес берілген.
Нәтижесінде 78 адам аталған қаржы пирамидасына 110 миллион теңгеден астам қаражат салған.
Қазір күдікті қамауға алынған. Сот шешімімен оның Алматы қаласындағы жер теліміне тыйым салынды. Қылмыстық іс сотқа жолданды.
Қаржы мониторингі агенттігі азаматтарға кез келген инвестициялық жобаның заңдылығын мұқият тексеріп, уәде етілген мәліметтің шынайылығына көз жеткізіп барып қана қаржы салуға кеңес береді.