Алматыда жастарды шығармашылық, спорт және ұлттық дәстүр негізінде жан-жақты дамытуға бағытталған қалалық бастамалар сериясы басталады, – деп хабарлайды aqshamnews.kz тілшісі.
Бағдарлама аясында студенттер мен NEET санатындағы жастарды қосқанда ондаған мың жасты қамтитын жобалар жоспарланған. Бұл туралы Өңірлік коммуникациялар қызметінде өткен баспасөз мәслихатында қалалық жастар саясаты басқармасының басшысы Азиз Кажденбек мәлімдеді.
Жобалар шығармашылықты дамыту, бұқаралық және ұлттық спорт түрлерін насихаттау, сондай-ақ мәдени және рухани құндылықтарды нығайту сынды үш негізгі бағыт бойынша жүзеге асырылады.
«Алматы қаласының жастар саясаты басқармасы жастарды қолдау бағытында жүйелі жұмыс жүргізіп келеді. Біз олардың жан-жақты дамуына жағдай жасап, қоғамдық өмірге белсенді араласуына ықпал етеміз. Зияткерлік, шығармашылық, рухани және спорттық әлеуетін ашуға ерекше көңіл бөлінеді. Бұл міндеттер біз үшін басым бағыт болып қала береді», — деді Азиз Кажденбек.
Бастамаларды іске асыру нәтижесінде жастардың қоғамдық белсенділігі артып, олардың дамуын қолдаудың орнықты жүйесі қалыптаспақ.
Бүгінде Алматыда 14 пен 35 жас аралығындағы 712,3 мың жас тұрады. Бұл қала халқының 32 пайызы. Оның ішінде 455,6 мыңы — жұмыс істейтін жастар, ал 307,8 мыңы — жоғары оқу орындары мен колледж студенттері.