Алматы қаласы көлік жүйесін дамыту мен экологиялық ахуалды жақсартуда жаңа белеске қадам басты. Бұл туралы Қала күні мерекесінде мегаполис басшысы Дархан Сатыбалды мәлім етті. Ол қала тұрғындарын меркесімен құттықтап, шаһардың инфрақұрылымдық дамуындағы басым бағыттарын атап көрсетті.
“Алдағы жылдары Алматыда халықаралық стандарттарға сай заманауи әрі интеграцияланған көлік жүйесі қалыптасатын болады. Бұл жолаушылар үшін қолайлы, қауіпсіз әрі экологиялық таза шешім болмақ. Қазірдің өзінде ұзындығы 100 шақырымнан астам BRT желісін дамыту бағдарламасы іске асырылып жатыр. Оның нәтижесінде қоғамдық көліктегі жолаушы тасымалы екі еседен астам артып, қозғалыс жылдамдығы 15%-ға өседі. Сонымен қатар, LRT желілерінің құрылысы басталып, метроның 20 км-ден астам жаңа тармағы жүргізіледі”, — деді қала әкімі.
Дархан Сатыбалдының айтуынша, экологиялық трансформация Алматының басты басымдықтарының бірі болып қалады. Қалада төмен эмиссиялық аймақтар енгізіліп, ЖЭО-2 мен ЖЭО-3 толықтай табиғи газға көшіріледі.
“Қазақстандағы алғашқы тұрмыстық қалдықтарды энергетикалық кәдеге жарату зауыты Алматыда салынады. Зауыт тәулігіне 2 мың тоннаға дейін қалдықты қайта өңдеп, жылына 60 мВт электр энергиясын өндіреді. Мұның бәрі 2028 жылға қарай Алматыдағы ауа сапасын екі есеге жақсартуға мүмкіндік береді. Бұл – мегаполистің басты міндеттерінің бірі – тұрғындардың өмір сүру сапасын арттыруға жасалған нақты қадам”, — деді шаһар басшысы.
Алматы әкімдігі көлік инфрақұрылымын дамытып, экологияны жақсарту және тұрақты дамуға негізделген қала моделін қалыптастыру шаһардың басым даму бағыты болып қалатынын баса белгіледі.