Алматыдағы Көкжайлау маңында туристік топтан қалып қойған Иран азаматы құтқарылды, деп хабарлайды Aqshamnews.kz тілшісі.
ТЖМ мәліметінше, Бостандық ауданында Көкжайлау шатқалы аумағында төмен түсіп келе жатқан туристердің бірі топтан қалып, байланысқа шықпай қалған. Өтініш бергендердің айтуынша, оның ұялы телефоны желі аясынан тыс болған.
Іздестіру-құтқару жұмыстарына ТЖМ-нің «Барыс» Республикалық құтқару жасағының жедел тобы шықты. Құтқарушылар таулы аумақты түнгі уақытта, көру мүмкіндігі шектеулі жағдайда тексерген.
Нәтижесінде Көкжайлау шатқалынан төмен тұста туристік топтан қалып қойған Иран азаматы табылды. Ол студент екені анықталды. Жас жігіт тау бөктерінде ұйықтап жатқан. Тексеру кезінде оған медициналық көмек қажет болмағаны белгілі болды.
Құтқарушылар оны қауіпсіз жерге жеткізіп, таудан түсуіне көмектесті.
ТЖМ тауға шығар алдында жақындарға нақты бағыт пен жорық уақыты туралы алдын ала хабарлау қажет екенін ескертті.