Алматы – Қонаев тасжолында жантүршігерлік жол апаты болды, деп хабарлайды aqshamnews.kz тілшісі.
Салдарынан бірнеше адам зардап шекті. Жол апаты болған жерден бейнежазбалар әлеуметтік желілерде тарады. Кадрларда трассада бірнеше көлікті көруге болады.
Алматы облыстық полиция департаментінің мәліметінше, үш көлік соқытығысқан жол апаты 5 маусымда сағат 22:50-де Алматы – Өскемен автожолының 47-шақырымында болған.
"Алдын ала деректер бойынша, Toyota Camry маркалы көліктің жүргізушісі алдында келе жатқан дәл сол маркалы көлікпен соқтығысқан. Соқтығыс салдарынан екі көлік те басқаруынан айырылып, жол жиегіндегі қоршауға соғылып, кейін Toyota Land Cruiser көлігімен қақтығысқан", – деп хабарлады полиция өкілдері.
Жол апатының салдарынан бірнеше адам түрлі дене жарақатын алды, олардың қатарында жол талғамайтын көліктің жүргізушісі және екі кәмелетке толмаған жолаушы бар.
"Жарақат алғандарға медициналық көмек көрсетілгеннен кейін үйлеріне жіберілді", – деді полиция.
Жол-көлік оқиғасы бойынша тексеріс жүргізіліп, барлық мән-жай анықталып жатыр.