Алматы Қоғамдық кеңесінің Қоғамдық даму комитеті «Алатау Ақпарат» медиахолдингінің жұмысын мониторингтен өткізді. Қоғамдық кеңес мүшелері журналистер мен басқа қызметкерлердің еңбек жағдайларына ерекше назар аударды, деп хабарлайды aqshamnews.kz
Комитет төрағасы Қайыржан Абдыхалықов бастаған мониторинг тобына Ерболат Байғанин, Жанна Исингарина, Виталий Колточник, Арман Құдабай, Мадия Төребаева және Руслан Заһарин кірді. Сарапшылар холдингтің кеңсесінде болып, редакция қызметкерлерімен кездесті.
Кездесу барысында, ұлттық және мемлекеттік бағдарламаларды насихаттау, газет оқырмандары мен сайт аудиториясын арттыру, білім беру орталықтары мен университеттермен ынтымақтастық, медиахолдингтің стратегиялық жоспарлары мен маркетингтік қадамдары сонымен қатар журналистер мен қызметкерлердің еңбек ету жағдайлары талданып, ұйымның қаржылық және ұйымдастырушылық мәселелері қарастырылды.
Қоғамдық даму комитеті медиахолдингтің «Халық үніне құлақ асатын мемлекет» тұжырымдамасын және қоғамдық кеңестер туралы заңға сәйкес азаматтық қоғаммен өзара әрекетін талқылады.
Редакция қызметкерлері өз жобалары мен болашақ жоспарларын таныстырып, инновацияларды дамытуға басымдық беруді мақсат ететінін айтты. Мониторинг барысында медиахолдингтің даму кезеңдері көрсетілген мұражайы мен жаңа подкаст студиясы таныстырылды. Бұл студия медиахолдингтің аудиториямен байланысын нығайтуға арналған жаңа креативті орталық болмақ.
Мониторинг нәтижесінде медиахолдингтің қоғам, ақпараттық кеңістік және мемлекеттік органдар арасындағы байланысты нығайтудағы рөлі жоғары бағаланды. Қоғамдық кеңес мүшелері «Алатау Ақпарат» медиахолдингінің даму мүмкіндіктеріне қолдау білдірді.