Алматыда мәслихат депутаты, «AMANAT» партиясының мүшесі Болат Ибрагимұлы ерекше қажеттіліктері бар 18 жастан асқан азаматтарға, соның ішінде зияткерлік дамуында ерекшеліктері мен кідірістері бар адамдарға және олардың ата-аналарына қолдау көрсететін «ASHYQ SANA» қоғамдық қорына көмек көрсетті, – деп хабарлайды aqshamnews.kz тілшісі.
«ASHYQ SANA» қоры күндізгі стационар форматында жұмыс істейді және қатысушыларды кешенді түрде қолдауды жүзеге асырады. Қор қызметінің негізгі бағыттары – денсаулықты қалпына келтіру және қолдау, өз-өзіне қызмет көрсету дағдыларын дамыту, әлеуметтік бейімдеу, сондай-ақ ата-аналарға қолдау көрсету. Әрбір қатысушы үшін оның жеке ерекшеліктері мен қажеттіліктерін ескере отырып, арнайы жеке бағдарлама әзірленеді.
Қатысушыларды тамақтандыруды ұйымдастыру мақсатында асхана және тұрмыстық құрал-жабдықтарға қажеттілік туындаған. Осыған байланысты Болат Ибрагимұлы қажетті ас үй және асхана жабдықтарын, ыдыс-аяқтар мен өзге де керек-жарақтарды қамтамасыз етті. Сонымен қатар, сабақтарға арналған кеңсе жабдықтары сияқты материалдар да берілді.
Көрсетілген қолдау ерекше қажеттіліктері бар жандардың күндізгі жағдайын жақсартуға мүмкіндік беріп, олардың ата-аналарына қосымша демеу болады. Қор өкілдерінің айтуынша, мұндай бастамалар инклюзивті ортаны дамытуға және мүмкіндігі шектеулі жандардың өмір сапасын арттыруға оң ықпал етеді.