Алматының 60 жастағы тұрғыны Ағабек Асылбеков кардиологиялық орталықта сәтті жасалған операциядан кейін қандай әсер алғанын айтты, – деп хабарлайды aqshamnews.kz тілшісі.
Пациенттің айтуынша, ол денсаулығы нашарлап, бірнеше жыл бойы қатты қиналыпты. Кардиологиялық орталыққа жүгінгеннен кейін дәрігерлер оны түгел тексеріп, емдеу тактикасын анықтап, операция жасауға кіріскен.
«Осында келген күннен бастап маған жақсы қарап, жанашырлық танытты. Дәрігерлерге ризамын. Операция да сәтті өтті, оңалу кезеңі де жеңіл болды. Қазір жағдайым жақсарып, көңіл-күйім көтеріліп қалды», – дейді пациент.
Бөлімшенің тазалығы мен жайлылығы, мамандардың кәсіби деңгейі мен дәрігерлердің қарым-қатынасы да көңілден шыққанын айтады пациент.
«Орталықтың ұжымына зор денсаулық, амандық пен жұмысына табыс тілеймін. Адамның қас-қабағына қарайды бәрі, кәсіби деңгейі де жоғары екен. Мұндай жерде қандай науқас болсын тез сауығып кетеді», – дейді.
Алматының қалалық Кардиологиялық орталығында қолданылатын осы заманғы диагностика мен емдеу әдісінің, сондай-ақ дәрігерлердің мол тәжірибесінің арқасында адамдардың сапалы медициналық көмекті дер кезінде алып, қайта қатарға қосылып жатқанына мысал бұл.