8 ақпан күні Алматы уақытымен сағат 14:00-де Ресейдің «Первый канал» телеарнасынан Алматыда түсірілген танымал «Повара на колесах» гастрономиялық реалити-шоуының жаңа шығарылымы эфирге шығады, деп хабарлайды aqshamnews.kz
Түсірілім 2025 жылы 2-5 қазан аралығында өтті. Бірнеше күн бойы Мәскеуден келген танымал бас аспаздар қаланың гастрономиялық мәдениетімен, тарихымен және ерекше атмосферасымен танысып, сондай-ақ Алматының көрнекті орындарын аралады. Бағдарламаға AUYL ұлттық тағамдар мейрамханасы, Алма-Арасан курорттық аймағы, жүргіншілерге арналған Арбат көшесі және Gorilla Energy Paaark енді. Байқау тағамдарына қажетті өнімдерді жоба қатысушылары Көк базардан сатып алған.
Жоба форматына сәйкес, танымал бас-аспаздар әртүрлі қалаларды аралап, жергілікті асхана мен дәстүрді зерттейді. Кейін авторлық тағамдар әзірлеп, аспаздық сайыс ұйымдастырады. Жеңімпазды қала тұрғындары анықтайды.
Түсірілім тобына Almaty Tourism Bureau командасы ұйымдастырушылық қолдау көрсетті. Сондай-ақ, түсірілімге AUYL мейрамханасының қазақстандық бас аспазы Аңсат Бисенбаев қатысып, ұлттық асхана мен жергілікті өнімдердің ерекшелігін таныстырды.