Қалалық полиция департаменті баспасөз қызметінің хабарлауынша, аталған көлік бірнеше өтелмеген әкімшілік айыппұлына байланысты арнайы айып тұрағына қойылған, – деп хабарлайды aqshamnews.kz тілшісі.
Арада бірнеше сағат өткен соң көлік иесі құжаттарын алып кету үшін айып тұрағына келген. Алайда ол құжаттарын алудың орнына көлікке отырып, айып тұрағынан өз бетінше шығып кеткені белгілі болды.
"Полиция көлікті іздеуге кірісті. Көлік Райымбек даңғылы мен Күдерин көшесінің маңынан табылып, қозғалысы тоқтатылды. Көлік қайтадан арнайы айып тұрағына жеткізілді. Жүргізушіге қатысты үш әкімшілік хаттама толтырылды. Сонымен қатар көлікті айып тұрағынан рұқсатсыз алып шыққаны бойынша қылмыстық іс қозғалды. Ер адам Жетісу аудандық полиция басқармасына жеткізілді", делінген полиция таратқан хабарламада.