Алматыда жолаушылардың қауіпсіздігін қамтамасыз ету және тасымалдау кезінде заң талаптарының сақталуын бақылауға бағытталған "Құқықтық тәртіп" жедел алдын алу іс-шарасы жалғасып жатыр, деп хабарлайды Аqshamnews.kz тілшісі Polisia.kz-ке сілтеме жасап.
Полицияның мәліметінше, ерекше назар қалааралық және халықаралық бағыттарға аударылып отыр. Себебі бұл бағыттарда жолаушылар тасымалы ережелерін бұзу, көлікті рұқсатсыз қайта жабдықтау, техникалық байқаудан өтпеген көлікті пайдалану және қауіпсіздік талаптарын сақтамау сияқты заң бұзушылықтар жиі анықталады.
Рейд барысында тәртіп сақшылары тасымалдаушы компаниялардың қызметін және "Сайран" автовокзалы маңындағы жеке шағын автобустарды тексеріп жатыр. Ереже бұзу деректері тіркелген жағдайда, әрқайсысы бойынша заңға сәйкес шаралар қабылданады.
"Жолаушылардың қауіпсіздігі - Алматы полициясы үшін басты міндет. Әсіресе қалааралық және халықаралық бағыттарда тасымалдаушыларға бақылау күшейтілді. Ереже бұзушылықтар тек қолайсыздық туғызып қана қоймай, адамдардың өмірі мен денсаулығына қауіп төндіреді. Біз мұндай фактілерді дер кезінде анықтап, жолын кесуге тырысамыз. Осы арқылы қала тұрғындары мен қонақтарының өзін қауіпсіз сезінуін қамтамасыз еткіміз келеді", - деді Әуезов аудандық полиция басқармасының бастығы Данияр Меңдебаев.