2025 жылғы 18 қаңтарда жатыр мойны обыры туралы хабардарлықты арттыру айлығы аясында Алматы Онкологиялық орталығында ашық есік күні өтті, деп хабарлайды aqshamnews.kz.
Іс-шараның басты мақсаты онкологиялық ауруларды ерте анықтау және халықты профилактиканың маңыздылығы туралы хабардар ету болды.
Бұл күні 97 адам мамандардан кеңес алды. Науқастардың бірінде алғаш рет қатерлі ісік ауруы немесе оған күдік анықталды. 40 жағдайда қатерлі ісікке дейінгі жағдайлар диагнозы қойылып, 56 науқаста басқа аурулар анықталды. Сондай-ақ, іс-шара аясында 17 ультрадыбыстық зерттеу және 33 цитологиялық талдау жүргізілді.
Онкогинекология бөлімінің меңгерушісі Райхан Болатбекова атап өткендей, фиброаденомалар немесе полиптер сияқты қатерлі ісікке дейінгі жағдайларды анықтаған кезде дәрігерлер кешенді тәсілді қолданады. Науқастар есепке алынады және гинекологтың немесе онкологтың бақылауында болады. Ультрадыбыстық, кольпоскопия, цитологиялық және қажет болған жағдайда гистологиялық зерттеулерді қамтитын үш айда бір рет бақылау тексерулері жүргізіледі. Онкологпен үнемі кеңесу науқастың жағдайын уақтылы бағалауға және қажет болған жағдайда хирургиялық немесе басқа емдеу туралы шешім қабылдауға көмектеседі. Жұмыстың маңызды элементі пациенттерге тұрақты медициналық тексерулер мен ұсыныстарды сақтау қажеттілігін түсіндіру болып табылады.
Онкологиялық орталықтағы Ашық есік күні-бұл диагноз қою мүмкіндігі ғана емес, сонымен қатар жатыр мойны обырының алдын алу мен емдеудің заманауи әдістері туралы көбірек білу мүмкіндігі. Мұндай іс-шаралар ауруларды ерте анықтауда және халықтың денсаулығына қамқорлық жасау әдетін қалыптастыруда шешуші рөл атқарады.